រដ្ឋមន្រ្តីការបរទេសទួរគីលោក Hakan Fidan និយាយថា ជំនួបថ្នាក់រដ្ឋមន្រ្តីការបរទេស នឹងរៀបចំឡើងនៅថ្ងៃចន្ទស្អែកនេះ ក្នុងទីក្រុងអ៊ីស្តង់ប៊ុល ដើម្បីពិភាក្សាលើបទឈប់បាញ់ និងជំហានបន្ទាប់ដែលចាំបាច់ ។

ថ្លែងនៅក្នុងសន្និសីទសារព័ត៌មាននៅទីក្រុងអង់ការ៉ា លោក Fidan និយាយថា ជំនួបនេះ រួមទាំងរដ្ឋមន្រ្តីការបរទេសដែលបានជួបប្រធានាធិបតីសហរដ្ឋអាមេរិកលោក Donald Trump កាលពីខែកញ្ញានៅទីក្រុងញូវយ៉ក ហើយពួកគេនឹងបង្កើតកម្លាំងការងារហ្កាហ្សា ។

លោក Fidan និយាយផងដែរថា កិច្ចខិតខំរក្សាបទឈប់បាញ់នៅហ្កាហ្សា នឹងត្រូវធ្វើឡើង ក៏ដូចជាឧបសគ្គនៃការរារាំងរបស់អ៊ីស្រាអែលលើលំហូរជំនួយមនុស្សធម៌ចូលទៅកាន់តំបន់ហ្កាហ្សាស្រ្ទីប ។

ក្រសួងការបរទេសទួរគីនិយាយថា ក្រុមមន្រ្តីដែលចូលរួមជំនួបនេះ រួមមានរដ្ឋមន្រ្តីការបរទេសមកពីអារ៉ាប់រួម កាតា ហ៊្សកដានី ប៉ាគីស្ថាន ឥណ្ឌូនេស៊ី និងអារ៉ាប៊ីសាអ៊ូឌីត ។

ខណៈពេលនោះដែរ អង្គការសហប្រជាជាតិ (UN) និងដៃគូមនុស្សធម៌របស់ខ្លួន បានប្រមូលជំនួយលើសពី ២៤.០០០តោន ពីច្រកឆ្លងកាត់តំបន់ហ្កាហ្សាស្ទ្រីប ចាប់តាំងពីបទឈប់បាញ់ចូលជាធរមាននៅថ្ងៃទី១០ ខែតុលា មក ។ 

លោក Stephane Dujarric អ្នកនាំពាក្យរបស់អគ្គលេខាធិការ UN បានបន្តថា លើសពីនេះ មានការថយចុះគួរឲ្យកត់សម្គាល់ក្នុងការស្ទាក់ចាប់ ឬការលួចជំនួយ ដែលប្រមូលបានដោយអង្គការសហប្រជាជាតិ និងដៃគូរបស់ខ្លួនពីច្រកហ្កាហ្សា ដោយបន្ថែមថា វាងថ្ងៃទី១០ ដល់ថ្ងៃទី២៨ ខែតុលា មានតែ ៥ភាគរយ ប៉ុណ្ណោះនៃគ្រឿងផ្គត់ផ្គង់ដែលប្រមូលបាន ត្រូវរាយការណ៍ថាមានគេស្ទាក់ផ្លូវ និងលួចទៅបាត់ បើធៀបនឹងប្រហែល ៨០ភាគរយ នៅចន្លោះថ្ងៃទី១៩ ខែឧសភា ដល់ថ្ងៃទី៩ ខែតុលា ៕