យោងតាមរដ្ឋមន្ត្រីការពារជាតិអាមេរិក លោក Pete Hegseth បានឲ្យដឹងថា សហរដ្ឋអាមេរិក និងចិន បានយល់ព្រមបង្កើតទំនាក់ទំនងផ្ទាល់ រវាងយោធារបស់នៃប្រទេសទាំង២ ដើម្បីជួយបញ្ចៀសកុំឲ្យកើតមានជម្លោះ។

តាមរយៈការបង្ហោះលើបណ្ដាញសង្គម X លោក Hegseth បានបញ្ជាក់ថា គោលបំណងនៃការបង្កើតបណ្តាញទាក់ទងនេះ នឹងធ្វើឡើង ដើម្បី «កាត់បន្ថយជម្លោះ និងកាត់បន្ថយបញ្ហាណាមួយដែលលេចឡើង»។ លោកបានបន្ថែមថា ប្រទេសទាំង២ បានព្រមព្រៀងគ្នាថា «សន្តិភាព ស្ថិរភាព និងទំនាក់ទំនងល្អ គឺជាផ្លូវដ៏ល្អបំផុត»។

ជាមួយគ្នានេះ លោក Hegseth បានឲ្យដឹងទៀតថា មន្ត្រីនៃប្រទេសទាំង២ នឹងធ្វើការពិភាក្សាគ្នា ដើម្បីស្វែងយល់ពីភាពលម្អិតនៃវិធីដែលភាគីទាំង២ នឹងធ្វើការប្រាស្រ័យទាក់ទងគ្នា។

គួរបញ្ជាក់ថា ប្រមុខមន្ទីរបញ្ចកោណរូបនេះ និងរដ្ឋមន្ត្រីការពារជាតិចិន លោក Dong Jun បានជួបប្រជុំគ្នា នៅទីក្រុងគួឡាឡាំពួរ ប្រទេសម៉ាឡេស៊ី កាលពីថ្ងៃទី៣១ ខែតុលា ពោលគឺមួយថ្ងៃបន្ទាប់ពីមានជំនួបកំពូលរបស់ប្រធានាធិបតីអាមេរិក លោក Donald Trump ជាមួយសមភាគីចិន គឺលោក Xi Jinping នៅកូរ៉េខាងត្បូង ជាទីដែលមេដឹកនាំទាំង២ បានយល់ព្រមផ្អាកជម្លោះពាណិជ្ជកម្ម ក្នុងគោលបំណងរក្សាស្ថិរភាពទំនាក់ទំនង រវាងប្រទេសដែលមានសេដ្ឋកិច្ចធំជាងគេទាំង២ របស់ពិភពលោក៕