ក្រសួងការបរទេសរបស់ប្រទេសរុស្ស៊ី កាលពីថ្ងៃសៅរ៍ (ទី១ ខែវិច្ឆិកា) បានរិះគន់ធ្ងន់ៗ ចំពោះ «កម្លាំងយោធាដ៏លើសលប់» របស់សហរដ្ឋអាមេរិក នៅសមុទ្រការ៉ាអ៊ីព ដែលត្រូវបានដាក់ពង្រាយជាផ្នែកមួយនៃការជំរុញកិច្ចប្រឹងប្រែងប្រឆាំងនឹងការជួញដូរគ្រឿងញៀន និងបានអះអាងជាថ្មីនូវការគាំទ្ររបស់ខ្លួន ចំពោះមេដឹកនាំវ៉េណេស៊ុយអេឡា។

នៅក្នុងអត្ថាធិប្បាយ តាមគេហទំព័ររបស់ក្រសួង អ្នកនាំពាក្យក្រសួងការបរទេស លោកស្រី Maria Zakharova បានលើកឡើងថា៖ «យើងបដិសេធយ៉ាងម៉ឺងម៉ាត់ ចំពោះការប្រើប្រាស់កម្លាំងយោធាលើសលប់ ដើម្បីអនុវត្តវិធានការ ក្នុងប្រតិបត្តិការប្រឆាំងគ្រឿងញៀន។ វិធានការបែបនេះ គឺបំពានទាំងច្បាប់ក្នុងស្រុករបស់សហរដ្ឋអាមេរិក និងបទដ្ឋាននៃច្បាប់អន្តរជាតិ»។

គួរដឹងថា យុទ្ធនាការរបស់សហរដ្ឋអាមេរិក នៅតំបន់ការ៉ាអ៊ីព និងប៉ាស៊ីហ្វិកភាគខាងកើត ប្រឆាំងនឹងអ្វីដែលទីក្រុងវ៉ាស៊ីនតោន ប្រាប់ថា ជាការជួញដូរគ្រឿងញៀនខុសច្បាប់នោះ បានកំណត់គោលដៅវាយប្រហារយ៉ាងហោចណាស់លើទូក ១៤គ្រឿង និងបានសម្លាប់មនុស្ស ៦១នាក់យ៉ាងតិច។ សហរដ្ឋអាមេរិកបានបង្កើតវត្តមានយោធាដ៏ធំ នៅតំបន់ការ៉ាអ៊ីព ក្នុងរយៈពេលប៉ុន្មានខែថ្មីៗនេះ ដោយមានយន្តហោះចម្បាំង នាវាចម្បាំង និងទាហានរាប់ពាន់នាក់។

ជាមួយគ្នានេះ តាមរយៈការអត្ថាធិប្បាយរបស់លោកស្រីនោះដែរ លោក Zakharova បានបន្ថែមថា៖ រុស្ស៊ីសូមបញ្ជាក់ពីការគាំទ្រយ៉ាងមុតមាំរបស់យើង ចំពោះការដឹកនាំរបស់វ៉េណេស៊ុយអេឡា ក្នុងការការពារអធិបតេយ្យភាពជាតិរបស់ខ្លួន»។

ប្រធានាធិបតីរុស្ស៊ី លោក Vladimir Putin និងសមភាគីវ៉េណេស៊ុយអេឡារបស់លោក គឺលោក Nicolas Maduro បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ នៅទីក្រុងមូស្គូ កាលពីខែឧសភា។ លោក Maduro បានចោទប្រកាន់ម្តងហើយម្តងទៀតថា សហរដ្ឋអាមេរិកកំពុងរំពឹងថា នឹងទម្លាក់រូបលោកចេញពីអំណាច៕