ទីភ្នាក់ងារអង្គការសហប្រជាជាតិ ទទួលបន្ទុកជនភៀសខ្លួនប៉ាឡេស្ទីន (UNRWA) បានប្រកាសកាលពីសប្តាហ៍មុនថា បន្ទាប់ពីមានការចាប់ផ្តើមនូវបទឈប់បាញ់ នៅតំបន់ហ្កាហ្សា ស្ថាប័នកំពុងបើកសាលារៀនឡើងវិញមួយចំនួន នៅក្នុងដែនដីនេះ ដោយកុមារបានវិលត្រឡប់ចូលថ្នាក់រៀនវិញជាបណ្តើរៗហើយ។

នៅលើបណ្ដាញសង្គម X កាលពីថ្ងៃអង្គារក្នុងសប្ដាហ៍កន្លងទៅ ប្រធាន UNRWA លោក Philippe Lazzarini បានឲ្យដឹងថា សិស្សសាលាជាង ២៥.០០០នាក់ បានចូលរួមរួចហើយជាមួយ «កន្លែងសិក្សាបណ្តោះអាសន្ន» របស់ទីភ្នាក់ងារនេះ ខណៈដែល ៣០០.០០០នាក់ នឹងអនុវត្តថ្នាក់អនឡាញ។

នៅឯសាលា Al Hassaina ភាគខាងលិចទីក្រុង Nuseirat នៅភាគកណ្តាលតំបន់ហ្កាហ្សាស្ទ្រីប កាលពីថ្ងៃសៅរ៍ (ទី១ ខែវិច្ឆិកា) ថ្នាក់រៀនទើបបានបើកឡើងវិញ បើទោះបីជាមានការខ្វះខាតបន្ទប់រៀនក៏ដោយ។ ក្មេងស្រី Warda Radwan ដែលជាសិស្សអាយុ ១១ឆ្នាំ បាននិយាយថា នាងកំពុងទន្ទឹងរង់ចាំយ៉ាងអន្ទះសារ ក្នុងការបានវិលត្រឡប់ទៅសិក្សាតាមទម្លាប់វិញ។

គួរបញ្ជាក់ថា ក្នុងអំឡុងសង្គ្រាមរយៈពេល ២ឆ្នាំ រវាងអ៊ីស្រាអែល និងក្រុមហាម៉ាស សាលា Al Hassaina មិនខុសពីកន្លែងរបស់ UNRWA ផ្សេងទៀតជាច្រើន នៅទូទាំងដែនដីនេះ បានក្លាយជាជម្រកជ្រកកោនសម្រាប់គ្រួសារជនភៀសខ្លួនរាប់សិបនាក់។ ហើយវត្តមានរបស់ប្រជាជនទាំងនោះ នៅតែអាចមើលឃើញដោយសារមានស្នួហាលសម្លៀកបំពាក់នៅទូទាំងអគារ ៣ជាន់របស់សាលានេះ៕