រដ្ឋមន្ត្រីការពារជាតិអាមេរិក លោក Pete Hegseth បានធ្វើដំណើរទៅដល់ទីក្រុងហាណូយហើយ កាលពីថ្ងៃអាទិត្យ (ទី២ ខែវិច្ឆិកា) ដើម្បីជួបជាមួយមន្ត្រីជាន់ខ្ពស់វៀតណាម ចំពេលមានកិច្ចពិភាក្សាដ៏យូរ ជុំវិញលទ្ធភាពផ្គត់ផ្គង់គ្រឿងយុទ្ធោបករណ៍ផ្សេងៗរបស់ទីក្រុងវ៉ាស៊ីនតោន ដល់អតីតគូសត្រូវរបស់ខ្លួន ក្នុងនោះរួមមានទាំងយន្តហោះដឹកជញ្ជូន និងឧទ្ធម្ភាគចក្រផងដែរ។

បើយោងតាមមន្ត្រីវៀតណាម ដែលបានរៀបរាប់សង្ខេបពីដំណើរទស្សនកិច្ចនេះ បានឲ្យដឹងថា លោក Hegseth ត្រូវបានរំពឹងថា នឹងជួបជាមួយប្រធានបក្សកុម្មុយនីស្តវៀតណាម លោក To Lam ប្រមុខរដ្ឋលោក Luong Cuong និងរដ្ឋមន្ត្រីក្រសួងការពារជាតិ លោក Phan Van Giang។

ហើយបើយោងតាមមន្ត្រី និងប្រភពវៀតណាមផ្សេងទៀត ដែលបានពន្យល់សង្ខេបអំពីបញ្ហានេះ បានឲ្យដឹងថា ការពិភាក្សា ស្តីពីការផ្គត់ផ្គង់អាវុធរបស់សហរដ្ឋអាមេរិក ត្រូវបានគេរំពឹងថា នឹងគ្របដណ្តប់លើរបៀបវារៈ។ ប្រភពទាំង២ បានលើកឡើងអំពីយន្តហោះដឹកជញ្ជូនយោធា C-130 Hercules របស់ក្រុមហ៊ុន Lockheed Martin ស្ថិតក្នុងចំណោមប្រធានបទដែលត្រូវពិភាក្សា។ ហើយមន្ត្រីអាមេរិកម្នាក់ទៀត ក៏បានអះអាងដែរថា យន្តហោះ C-130 នឹងត្រូវបានលើកយកមកពិភាក្សា។

ប្រភពមួយក្នុងចំណោមប្រភពពីវៀតណាមទាំងនោះ បានបង្ហើបឲ្យដឹងថា ការផ្គត់ផ្គង់ឧទ្ធម្ភាគចក្ររបស់អាមេរិក ក៏អាចត្រូវបានពិភាក្សាផងដែរ ជាពិសេស គឺប្រភេទ S-92 របស់ក្រុមហ៊ុន Lockheed Martin និង Chinook របស់ក្រុមហ៊ុន Boeing។ ប្រភពទាំង ៣នេះ បាននិយាយក្នុងលក្ខខណ្ឌមិនបញ្ចេញឈ្មោះដោយសារព័ត៌មាននេះមិនត្រូវបានអនុញ្ញាតឲ្យបញ្ចេញជាសាធារណៈឡើយ។ ហើយជាមួយគ្នានេះ ពួកគេទាំងអស់ បាននិយាយថា គេមិនច្បាស់នោះឡើយថា តើកិច្ចព្រមព្រៀង ឬការប្រកាសណាមួយ នឹងត្រូវបានធ្វើឡើងនៅថ្ងៃអាទិត្យនោះ៕