ប្រទេសចិន និងកូរ៉េខាងត្បូង បានពិភាក្សាអំពីការពង្រីកការផ្លាស់ប្តូរវប្បធម៌ អំឡុងកិច្ចប្រជុំកំពូលទ្វេភាគី រវាងមេដឹកនាំរបស់ប្រទេសទាំង២ កាលពីថ្ងៃសៅរ៍ (ទី១ ខែវិច្ឆិកា) នៅទីក្រុង Gyeongju ដោយនេះបានបង្កើនសង្ឃឹមកាន់តែខ្ពស់ អំពីការមានលទ្ធភាពនៃការបន្ធូរបន្ថយ ចំពោះការរឹតបន្តឹងក្រៅផ្លូវការរបស់ទីក្រុងប៉េកាំង លើកម្មវិធីបែបកម្សាន្តរបស់កូរ៉េខាងត្បូង។

សារព័ត៌មាន Yonhap បានដកស្រង់សម្តីទីប្រឹក្សាសន្តិសុខជាតិ លោក Wi Sung-rak ដែលបាននិយាយថា ប្រធានាធិបតីចិន លោក Xi Jinping និងមេដឹកនាំកូរ៉េខាងត្បូង លោក Lee Jae Myung បានព្រមព្រៀងគ្នា លើតម្រូវការ ក្នុងការពង្រីកកិច្ចសហប្រតិបត្តិការផ្នែកវប្បធម៌។

សេចក្ដីរាយការណ៍ពីសារព័ត៌មាននេះ បានឲ្យដឹងទៀតថា លោក Wi បានបន្ថែមថា «ការរឹតបន្តឹងផ្នែកច្បាប់ និងនីតិវិធី» ទាំងឡាយ បង្កជាឧបសគ្គដល់ការធ្វើឲ្យមានប្រក្រតីភាពពេញលេញនៃការផ្លាស់ប្តូរមាតិកានានា។

គួរបញ្ជាក់ថា ការហាមប្រាមក្រៅផ្លូវការរបស់ប្រទេសចិន លើកម្មវិធីផ្នែកកម្សាន្តរបស់កូរ៉េខាងត្បូង រាប់ចាប់ពីការប្រគុំតន្ត្រី K-pop (ខេប៉ុប) រហូតដល់រឿងភាគតាមទូរទស្សន៍ និងភាពយន្ត ត្រូវបានចេញប្រហែលជាមួយទសវត្សរ៍មុន បន្ទាប់ពីមានការសម្រេចរបស់កូរ៉េខាងត្បូង ក្នុងការដាក់ពង្រាយប្រព័ន្ធការពារមីស៊ីលរបស់សហរដ្ឋអាមេរិក ដែលទីក្រុងប៉េកាំងចាត់ទុកថា ជាការគំរាមកំហែងផ្នែកសន្តិសុខ។

ការរំពឹងទុកនូវការបន្ធូរបន្ថយនូវអ្វីដែលហៅថា «បម្រាមវប្បធម៌កូរ៉េខាងត្បូង» នេះ បានកើតឡើងបន្ទាប់ពីសមាជិកសភាកូរ៉េខាងត្បូង លោក Kim Young-bae តាមរយៈការបង្ហោះនៅលើបណ្ដាញសង្គម បានលើកឡើងថា លោក Xi បានប្រតិកម្មជាវិជ្ជមាន ចំពោះការស្នើរបស់កូរ៉េខាងត្បូង ក្នុងការប្រារព្ធកម្មវិធីប្រគុំតន្ត្រី K-pop នៅទីក្រុងប៉េកាំង៕