​បាល់ទាត់៖ ក្រុមហ៊ុន​លី​គ​បាល់ទាត់​កម្ពុជាបានប្រកាស​និមិត្តសញ្ញា​ឡូហ្គោ​ថ្មី (LOGO) សម្រាប់​ក្របខណ្ឌ​លី​គ​កំពូល​កម្ពុជា ឬ Cambodian Premier League និង​ក្របខណ្ឌ​លី​គ​លំដាប់​ទី​២ ឬ Cambodian League 2 ជា​ផ្លូវការកាលពី​ថ្ងៃទី​១០ ខែកុម្ភៈនៅ​សណ្ឋាគារ Emion Hotel ក្រោម​វត្តមាន​នាយក​ប្រតិបត្តិ​លោក Satoshi Saito និង​មានការ​ចូលរួម​ពី​សមាជិក​លី​គ​កំពូល​ទាំង ៨​ក្លិប​ផងដែរ។​

​ក្រោយ​បង្ហាញ​ឡូ​ហ្គោល​ថ្មី លោក Satoshi Saito បានបង្ហាញ​អត្ថន័យនៃ​និមិត្តសញ្ញា​នីមួយៗ រួមមាន​ពណ៌​ខ្មៅ ពណ៌​ក្រហម និង​ពណ៌​បៃតង។ លោក​ពន្យល់ថា សម្រាប់​ពណ៌​ខ្មៅ គឺ​តំណាង​ឲ្យ​សាជីវកម្ម និង​ការយល់ឃើញនៃ​គំនិត​ច្នៃប្រឌិត​ថ្មីៗ។ ពណ៌​ក្រហម នៃ​លី​គ​កំពូល ឬ​លី​គ​ទី​១ ត្រូវបាន​បំផុសគំនិត​ដោយ​ទង់ជាតិ​កម្ពុជា ហើយក៏​ជាស​ញ្ញា​នៃ​ព្រះអាទិត្យ​រះ និង​ការតាំង​ចិត្ត ខណៈ​ពណ៌​បៃតង នៃ​លី​គ​ទី​២ តំណាង​ឲ្យ​យុវជន ការ​ដុះ​ពន្លក​នៃ​ដើមឈើ និង​អ្វីៗ​ដែល​ចាប់ផ្តើម​ថ្មី​។​ ​លើសពីនេះ ស្រមោល​ទាំងអស់នៃ​និមិត្តសញ្ញា​នីមួយៗ ត្រូវបាន​បំផុស​គំ​និ​ត​ដោយ​រូប​ស្រមោល​របស់​ខ្មែរ​បន្ថែម​លើ​និមិត្តរូប​នៃ​ទឹកដី​កម្ពុជា​ទៀតផង។ នាយក​ប្រតិបត្តិ​ដដែល​រំពឹង​យ៉ាង​មុតមាំ​ថា និមិត្តសញ្ញា​ទាំងអស់នេះនឹង​ក្លាយជា​និមិត្តសញ្ញា​នៃ​ភាព​មុះ​ម៉ត់ និង​សេចក្ដីស្រលាញ់ចំពោះ CPL សម្រាប់​អ្នកគាំទ្រ​កម្ពុជា​ទាំងអស់ក្នុង​យុគសម័យ​ថ្មី​នៃ​បាល់ទាត់​កម្ពុជា ដែល​ដឹកនាំ​ដោយ​សហព័ន្ធ​កីឡាបាល់ទាត់​កម្ពុជា។​

​ដំណាលគ្នា​នឹង​ការបង្ហាញ «​ឡូហ្គោ​» ថ្មី​នេះ ក្រុមហ៊ុន​លី​គក៏បាន​រៀបចំ​ការចាប់​ឆ្នោត​បើក​ការប្រកួត​រដូវ​កាល​ថ្មី​រួចរាល់​ផងដែរ ដែល​ការប្រកួត​នឹង​ចាប់ផ្ដើម​នា​ថ្ងៃទី​០៥ ខែមីនា​ខាងមុខ ដោយ​ក្រុម​បឹងកេតត្រូវ​ជួប​ក្រុម​ណាហ្គា​វើ​ល​ដ៏នៅ​កីឡដ្ឋាន Cambodia Airway ស្របពេល​ក្រុម​កង​យោពល​ខេមរភូមិន្ទត្រូវ​បើកទ្វារ​កីឡដ្ឋាន​ស្ដា​ត​ចាស់ ទទួល​ក្រុម​ការពារ​តំណែង​ជើងឯក​ភ្នំពេញ​ក្រោ​ន។ រីឯ​ព្រះខ័ន​រាជ​ស្វាយរៀងត្រូវ​ជួប​ក្រុម​ភ្ញៀវ​គិរីវង់នៅ​កីឡដ្ឋាន​ខេត្តស្វាយរៀង និង​ក្រុម​អង្គ​រថា​យ​ហ្គឺ​រជួប​វិសាខានៅ​កីឡដ្ឋាន SRU ខេត្តសៀមរាប៕

​អត្ថបទ៖ លី ឈុន​ឡា