ខេត្តកំពង់ស្ពឺ៖ នាព្រឹកថ្ងៃអាទិត្យ ទី០២ ខែវិច្ឆិកា ឆ្នាំ២០២៥ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារចុះជួយមូលដ្ឋានខេត្តកំពង់ស្ពឺ បានអញ្ជើញចូលរួមពិធីដង្ហែអង្គកឋិនទានទៅកាន់វត្តម្រុំខាងជើង ស្ថិតក្នុងក្រុងច្បារមន ខេត្តកំពង់ស្ពឺ។ ពិធីបុណ្យកឋិនទានេះ ក៏មានការអញ្ជេីញចូលរួម​ពី​ឯកឧត្ដម​ប្រធានក្រុមប្រឹក្សាខេត្ត​ សមាជិក​ សមាជិកា​នៃក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ឯកឧត្ដម​អភិបា​លខេត្ត​ អភិបាលរងខេត្ត​ មន្ទីរអង្គភាពជុំវិញខេត្ត​ និងពុទ្ធបរិស័ទចំណុះជើងវត្តជិតឆ្ងាយ​៕

បុណ្យកឋិន គឺជា​បុណ្យ​១​របស់​ព្រះពុទ្ធសាសនា ដែលមាន​រយៈពេល​២៩​ថ្ងៃ គឺ​ចាប់​ពីថ្ងៃ​១​រោច ខែអស្សុជ ដល់​ថ្ងៃ​១៥​កើត ខែ​ក​ក្តិ​ក​។ អាច​និយាយបានថា ពុទ្ធបរិស័ទ ចាប់ផ្តើម​ធ្វើបុណ្យ​កឋិន នៅក្រោយ​ថ្ងៃ​ចេញ​ព្រះវស្សា​។ ការចូល​ព្រះវស្សា​របស់​ព្រះសង្ឃ មាន​រយៈពេល​៣​ខែ​។ ​កឋិន​កាល គឺជា​រដូវ​ដែល​ប្រជា​ពុទ្ធបរិស័ទ នាំយក​សំពត់​ជា​គ្រឿង​ស្លៀកដណ្តប់​របស់​ព្រះសង្ឃ មាន​ចីពរ​ជាដើម ទៅ​ប្រគេន​ព្រះសង្ឃ​។ បច្ចុប្បន្ន គេ ឃើញ​ពុទ្ធបរិស័ទ មិន​ត្រឹមតែ​ប្រគេន​ចីវរ​ទេ នៅ​ប្រគេន​ទេយ្យទាន​ផ្សេងៗ​ទៀត ដូចជា គ្រឿង​បរិភោគ និង ថ្នាំសង្កូវ ជាដើម រួមទាំង​បច្ច័យ​ផងដែរ (​ថវិកា​)​។ 

ក្នុងនាមជាយុវជន និងជាពុទ្ធបរិសទ យើងត្រូវបន្តថែរក្សាកេរ្តិ៍មរតករបស់ដូនតា ជាពិសេសគឺបុណ្យកឋិនទាន ដែលជាពិធីបុណ្យក្នុងព្រះពុទ្ធសាសនា ដែលជាប្រពៃណីជាតិខ្មែរយើងផងដែរ៕