ក្រុមហាម៉ាស កាលពីថ្ងៃអាទិត្យ (២ វិច្ឆិកា) បានប្រគល់សាកសពចំណាប់ថ្នូរ ៣នាក់ទៀតហើយ ទៅឱ្យអ៊ីស្រាអែល ខណៈការចោទប្រកាន់ដាក់គ្នាទៅវិញទៅមករឿងបំពានលើបទឈប់បាញ់រវាងក្រុមសកម្មប្រយុទ្ធប៉ាឡេស្ទីនមួយនេះ ជាមួយអ៊ីស្រាអែល នៅតែបន្ត។

ការិយាល័យរបស់លោកនាយករដ្ឋមន្ត្រី Benjamin Netanyahu បាននិយាយថា កងកម្លាំងអ៊ីស្រាអែលនៅតំបន់ហ្កាហ្សា បានទទួលមឈូសដែលដាក់សពចំណាប់ថ្នូរ ៣នាក់ តាមរយៈកាកបាទក្រហម ហើយសពទាំងនោះនឹងត្រូវបញ្ជូនទៅទឹកដីអ៊ីស្រាអែល ដើម្បីកំណត់អត្តសញ្ញាណ។

នៅមុនការប្រគល់លើកចុងក្រោយនៅថ្ងៃអាទិត្យនេះ ក្រុមហាម៉ាស បានឱ្យសាកសព ១៧នាក់រួចហើយ ទៅអ៊ីស្រាអែល ក្នុងចំណោមតួលេខសរុប ២៨នាក់។ ប្រសិនបើសាកសពទាំង៣ ត្រូវកំណត់ដឹងថាជាចំណាប់ថ្នូរអ៊ីស្រាអែលមែន នោះនឹងនៅសល់តែសាកសព ៨នាក់ទៀតប៉ុណ្ណោះ នៅតំបន់ហ្កាហ្សា ដែលក្រុមហាម៉ាស ត្រូវតែប្រគល់មកវិញក្រោមលក្ខខណ្ឌបទឈប់បាញ់ សម្របសម្រួលដោយអាមេរិក និងចូលជាធរមានតាំងពីថ្ងៃទី១០ ខែតុលា មក។

អ៊ីស្រាអែលបន្ទោសថា ក្រុមហាម៉ាស បញ្ជូនសាកសពយឺតយ៉ាវណាស់ ខណៈហាម៉ាសប្រកែកថា ខ្លួនកំពុងតែប្រឹងប្រែងអស់លទ្ធភាពហើយ ក្រោមលក្ខខណ្ឌដ៏លំបាក។

គិតមកទល់ពេលនេះ ក្រុមហាម៉ាស បានដោះលែងចំណាប់ថ្នូរដែលនៅរស់ ទាំងអស់ ២០នាក់ ដោះដូរនឹងអ្នកទោសប៉ាឡេស្ទីនជិត ២.០០០នាក់ និងអ្នកជាប់ឃុំក្នុងសម័យសង្គ្រាម ពីពន្ធនាគារអ៊ីស្រាអែល។ ក្រុមហាម៉ាស ក៏បានយល់ព្រមប្រគល់សពចំណាប់ថ្នូរដែលបានស្លាប់ សរុបចំនួន ២៨នាក់នោះ ដោះដូរនឹងសាកសពពួកសកម្មប្រយុទ្ធប៉ាឡេស្ទីន ៣៦០នាក់ ដែលស្លាប់ក្នុងសង្គ្រាម៕