ប្រទេសនីហ្សេរីយ៉ាបាននិយាយថា ខ្លួននឹងស្វាគមន៍ជំនួយពីសហរដ្ឋអាមេរិកក្នុងការប្រយុទ្ធនឹងក្រុមប្រដាប់អាវុធនានា ដរាបណាបូរណភាពទឹកដីរបស់ខ្លួនត្រូវបានគោរព ខណៈប្រធានាធិបតីអាមេរិក លោកDonald Trump បានបន្តគំរាមដោយចំណាត់ការយោធាក្នុងប្រទេសអាហ្វ្រិកខាងលិចមួយនេះ ជុំវិញអ្វីដែលលោកបានអះអាងថាជាការបៀតបៀនដល់គ្រិស្តបរិស័ទ នៅទីនោះ។

ក្រុមមន្ត្រី និងអ្នកជំនាញ ក្នុងប្រទេសនីហ្សេរីយ៉ាកាលពីថ្ងៃអាទិត្យបានបដិសេធការអះអាងរបស់លោក Trump អំពីការសម្លាប់គ្រិស្តសាសនិកយ៉ាងច្រើន ដោយកត់សម្គាល់ថាក្រុម Boko Haram និងក្រុមដែលមានទំនាក់ទំនងនឹងក្រុមភេរវករ al-Qaeda កំណត់គោលដៅលើមនុស្សគ្រប់ជំនឿនៅក្នុងប្រទេសដែលមានប្រជាជនច្រើនបំផុតនៅអាហ្វ្រិកមួយនេះ ។

ប៉ុន្តែ លោកTrump ដែលបានណែនាំរដ្ឋាភិបាលរបស់លោកឱ្យរៀបចំសម្រាប់សកម្មភាពយោធាឲ្យបានលឿនបំផុត នៅក្នុងប្រទេសដែលមានប្រជាជនច្រើនបំផុតនៅអាហ្វ្រិក បានសម្រាលការគំរាមកាលពីថ្ងៃអាទិត្យ ដោយនិយាយថារូបលោក កំពុងពិចារណាជម្រើសយោធាជាច្រើននៅក្នុងប្រទេសនីហ្សេរីយ៉ា។

នៅពេលសួរដោយអ្នកសារព័ត៌មានថាតើរូបលោកកំពុងពិចារណាបញ្ជូនកងទ័ពអាមេរិកចូលទៅទឹកដី ប្រទេសនីហ្សេរីយ៉ា ឬការវាយប្រហារតាមអាកាសឬទេ លោក Trump បានឆ្លើយតបថាលោកនៅមានបញ្ហាជាច្រើនទៀតត្រូវពិចារណា។ 

លោកបានបន្ថែមថា ពួកគេកំពុងសម្លាប់គ្រិស្តសាសនិកក្នុងចំនួនដ៏ច្រើន។អាមេរិក នឹងមិនអនុញ្ញាតឲ្យមានរឿងនោះកើតឡើងទេ៕