អ្នកនាំពាក្យរដ្ឋាភិបាលកេនយ៉ា បាននិយាយកាលពីថ្ងៃអាទិត្យ (២ វិច្ឆិកា) ថា ចំនួនអ្នកស្លាប់ដោយសារបំណាក់ដីដ៏មហន្តរាយនៅជ្រលងភ្នំ Rift ភាគខាងលិចប្រទេសនេះ បានកើនឡើងដល់ ២៦នាក់ហើយ បន្ទាប់ពីមានភ្លៀងធ្លាក់ខ្លាំងកាលពីថ្ងៃសៅរ៍ ចំណែកអ្នកបាត់ខ្លួនមានចំនួន ២៥នាក់។

អ្នកនាំពាក្យរដ្ឋាភិបាល លោក Isaac Mwaura បាននិយាយក្នុងសេចក្តីថ្លែងការណ៍មួយថា ក្រៅពីនេះ មនុស្ស ២៦នាក់ ផ្សេងទៀតត្រូវបានជួយសង្គ្រោះ បន្ទាប់ពីទឹកជំនន់បង្កការបំផ្លិចបំផ្លាញនៅក្នុងតំបន់ Elgeyo-Marakwet ហើយអ្នករួចជីវិតភាគច្រើន កំពុងទទួលការព្យាបាល។

លោក Mwaura បន្ថែមថា រដ្ឋាភិបាលបានបញ្ជូនយន្តហោះយោធា និងអ្នកឯកទេសឆ្លើយតបគ្រោះមហន្តរាយ ដើម្បីធ្វើប្រតិបត្តិការស្វែងរក និងជួយសង្គ្រោះ។

គួរឱ្យដឹងថា ប៉ុន្មានឆ្នាំថ្មីៗនេះ មនុស្សរាប់រយនាក់ត្រូវបានសម្លាប់ក្នុងបំណាក់ដី និងទឹកជំនន់នៅកេនយ៉ា ដោយក្រុមអ្នកវិទ្យាសាស្ត្រព្រមានថា បម្រែបម្រួលអាកាសធាតុកំពុងជំរុញឱ្យមានព្រឹត្តិការណ៍អាកាសធាតុបែបនេះ កាន់តែខ្លាំងក្លា និងញឹកញាប់ឡើង។ កាលពីឆ្នាំ២០២៤កន្លងទៅ ជាគ្រោះមហន្តរាយដ៏អាក្រក់បំផុតសម្រាប់កេនយ៉ា ដោយមនុស្សជាង ៦០នាក់ ស្លាប់ក្នុងបំណាក់ដី និងទឹកជំនន់យ៉ាងគំហុកនៅភាគកណ្តាលនៃប្រទេស៕