រដ្ឋមន្ត្រីរតនាគារ លោក Scott Bessent បានព្រមានកាលពីថ្ងៃអាទិត្យទី២ ខែវិច្ឆិកាថា រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump ត្រៀមបង្កើនពន្ធលើប្រទេសចិន ប្រសិនបើរដ្ឋាភិបាលទីក្រុងប៉េកាំងបន្តទប់ស្កាត់ការនាំចេញរ៉ែកម្រ។

ប្រទេសចិន បានប្រកាសកាលពីថ្ងៃព្រហស្បតិ៍មុនថាខ្លួននឹងផ្អាករយៈពេលមួយឆ្នាំចំពោះការរឹតត្បិតដែលខ្លួនបានដាក់កាលពីខែតុលាលើសម្ភារៈនិងបច្ចេកវិទ្យារ៉ែកម្រ ប៉ុន្តែលោក Bessent បានសម្តែងការព្រួយបារម្ភថាទីក្រុងប៉េកាំង តែងតែមិនធ្វើតាមការប្តេជ្ញាចិត្តរបស់ខ្លួន។

លោក Bessent បានប្រាប់សារព័ត៌មាន Fox News ថា «ចិនបានរឹតត្បិតទីផ្សារលើរ៉ែកម្រ ហើយគួរឲ្យស្តាយ ពេលខ្លះវាបានបង្ហាញថាជាដៃគូដែលមិនគួរឱ្យទុកចិត្ត»។ ថ្វីត្បិតតែលោហធាតុទាំងនេះ ត្រូវបាននាំចេញពីប្រទេសផ្សេងៗរួមទាំងសហរដ្ឋអាមេរិកក៏ដោយ ប៉ុន្តែប្រទេសចិន មានសិទ្ធិផ្តាច់មុខលើការកែច្នៃលោហធាតុទាំងនេះសម្រាប់ការប្រើប្រាស់ក្នុងឧស្សាហកម្ម។

ការផ្អាកនេះត្រូវបានប្រកាសបន្ទាប់ពីកិច្ចចរចាកាលពីពេលថ្មីៗនេះរវាង លោក Trump និងសមភាគីចិន លោក Xi Jinping នៅក្នុងប្រទេសកូរ៉េខាងត្បូង។ កាលពីពេលមុន ការរឹតត្បិតការនាំចេញមួយចំនួនដែលបានសម្រេចដោយទីក្រុងប៉េកាំង នៅតែមានដដែល។

លោក Bessent បាននិយាយថា «យើងគ្មានបំណងផ្តាច់ខ្លួនជាមួយប្រទេសចិនទេ ប៉ុន្តែយើងនឹងត្រូវកាត់បន្ថយហានិភ័យ»។ លោក Bessent ក៏បានចោទប្រកាន់រដ្ឋាភិបាលអាមេរិកមុនៗថាបាន «លង់លក់មិនខ្វល់ខ្វាយលើបញ្ហានេះ» ខណៈទីក្រុងប៉េកាំងបានចំណាយពេលជាច្រើនឆ្នាំដាក់បញ្ចូលគ្នានូវយុទ្ធសាស្ត្ររ៉ែកម្ររបស់ខ្លួន។