​បាល់ទាត់៖ ​ខ្សែប្រយុទ្ធ​ប្រេ​ស៊ី​ល Neymar បាន​វិល​មក​ហ្វឹកហាត់​វិញ​ជាមួយ Paris Saint Germain នៅ​ថ្ងៃ​ព្រហស្បតិ៍​ម្សិលមិញ​ក្រោយ​អវត្តមាន​ដោយសារ​របួស​តាំងពី​ខែវិច្ឆិកា​។ ​​កីឡាករ​វ័យ ៣០ឆ្នាំ​រូបនេះ​បាន​រងរបួស​កជើង​តាំង​ពីថ្ងៃ​ទី២៨ ខែវិច្ឆិកា​ ឆ្នាំ២០២១ កន្លងទៅ​ពេល PSG ជួប​ជាមួយ Saint Etienne ដែល​ធ្វើឱ្យ​អតីត​កីឡាករ​របស់ Barcelona រូបនេះ​អវត្តមាន​សរុប ១២ប្រកួត​រួចមកហើយ​។

​​អ្នកចាត់ការ PSG លោក Mauricio Pochettino បាន​បញ្ជាក់ថា ​ស្ថានភាព​របស់ Neymar នៅពេល​មាន​ភាពល្អប្រសើរ​ច្រើន តែ​គេ​មិនអាច​ចូល​លេង​ឡើយ​នៅពេល PSG ជួប Rennes ក្របខណ្ឌ​បារាំង Ligue 1 យប់​នេះ​។ ​​អ្នកចាត់ការ​សញ្ជាតិ​អា​ហ្ស​ង់​ទីន​រូបនេះ​ក៏​មិនទាន់​អាច​បញ្ជាក់​បានដែរ​ថា Neymar នឹង​អាច​ចូល​លេង​បាន​រឺ​អត់​នៅពេល PSG ជួប Real Madrid នៅ​វគ្គ ១៦ក្រុម​ចុងក្រោយ UEFA Champions League​។ ​យ៉ាងណាក្តី​អវត្តមាន​របស់ Neymar ក៏​មិនសូវ​ជា​បញ្ហា​ដែរ ពោលគឺ PSG តាំងពីដើម​ខែតុលា​នៅ​ក្របខណ្ឌ​បារាំង Ligue 1 មិនទាន់​ចាញ់​មួយ​ប្រកួត​ណា​ឡើយដែល​រួមមាន​ឈ្នះ ៩ ស្មើ ៥ នៃ ១៤ប្រកួត​ចុងក្រោយ​ក្នុង​លី​គ និង​កំពុង​នាំមុខ​ដាច់ ១៣ពិន្ទុ​៕

​អត្ថបទ​៖​នាង សុភា​វុ​ធ