ចាប់តាំងពីបទឈប់បាញ់សម្របសម្រួលដោយសហរដ្ឋអាមេរិករវាងក្រុមហាម៉ាស និងអ៊ីស្រាអែល បានចូលជាធរមានកាលពីខែមុន អ៊ីស្រាអែលបានបន្តការវាយប្រហារដ៏ខ្លាំងក្លារបស់ខ្លួននៅទូទាំងតំបន់ហ្កាហ្សា ដោយបានសម្លាប់ពលរដ្ឋប៉ាឡេស្ទីនយ៉ាងហោចណាស់ជិត២៤០នាក់ និងរបួសជាង៦០០នាក់ នេះបើយោងតាមអាជ្ញាធរសុខាភិបាលតំបន់ហ្កាហ្សា។

ក្នុងរយៈពេល២៤ម៉ោងកន្លងទៅនេះ មន្ទីរពេទ្យនានានៅតំបន់ហ្កាហ្សាបានរាយការណ៍ពីការស្លាប់មនុស្ស ៣នាក់បន្ថែមទៀត និងបានរកឃើញសាកសពបីនាក់នៅក្រោមអគារបាក់រលំ។

ក្នុងចំណោមជនរងគ្រោះចុងក្រោយគឺបុរសជនជាតិប៉ាឡេស្ទីនម្នាក់ដែលត្រូវបានសម្លាប់ដោយការវាយប្រហារដោយយានដ្រូនរបស់អ៊ីស្រាអែលនៅក្នុងសង្កាត់ Shujayea ភាគខាងជើងតំបន់ហ្កាហ្សា។

យោធាអ៊ីស្រាអែលបាននិយាយថាបុរសនោះបានឆ្លងកាត់ខ្សែបន្ទាត់លឿងដែលសម្គាល់ព្រំដែនបទឈប់បាញ់ ហើយបានចូលទៅជិតទាហានរបស់ខ្លួន។ នៅក្នុងសេចក្តីថ្លែងការណ៍ កងទ័ពបានអះអាងថា បុរសនោះ «បានរុលចូលទៅមុខឆ្ពោះទៅរកកងទ័ពនៅភាគខាងជើងតំបន់ហ្កាហ្សា ដែលជាការគំរាមកំហែងភ្លាមៗ» ជំរុញឱ្យមានការវាយប្រហារតាមអាកាស «ដើម្បីដកចេញការគំរាមកំហែង»។