រដ្ឋមន្ត្រីការពារជាតិអាមេរិក លោក Pete Hegseth កំពុងតែធ្វើទស្សនកិច្ចនៅកូរ៉េខាងត្បូង នាថ្ងៃចន្ទ (៣ វិច្ឆិកា) នេះ សម្រាប់កិច្ចពិភាក្សាដែលរំពឹងថា នឹងពាក់ព័ន្ធនឹងគោលដៅរបស់ទីក្រុងវ៉ាស៊ីនតោន ក្នុងការកែសម្រួលតួនាទីរបស់ទាហានអាមេរិក ក្នុងប្រទេសនេះ ក្រោមបរិយាកាសសន្តិសុខដែលចេះតែវិវត្តទៅមុខ ហើយប្រធានមន្ទីរបញ្ចកោណរូបនេះក៏ត្រូវរំពឹងថា នឹងទៅពិនិត្យព្រំដែនគ្មានយោធា DMZ ជាមួយកូរ៉េខាងជើងផងដែរ។

ប្រមុខការពារជាតិរបស់សម្ព័ន្ធមិត្តទាំងពីរ គ្រោងបើកកិច្ចប្រជុំប្រឹក្សាសន្តិសុខប្រចាំឆ្នាំ (SCM) នៅថ្ងៃអង្គារស្អែកនេះ ដែលជាវេទិកាកម្រិតខ្ពស់បំផុតក្នុងការកំណត់ទិសដៅនៃសម្ព័ន្ធភាពយោធារបស់ពួកគេ និងការទប់ស្កាត់របស់កូរ៉េខាងត្បូង ប្រឆាំងនឹងកូរ៉េខាងជើង ដែលមានអាវុធនុយក្លេអ៊ែរ។

ក្រសួងការពារជាតិកូរ៉េខាងត្បូង បាននិយាយថា ប្រមុខការពារជាតិក្រុងសេអ៊ូល លោក Ahn Gyu-back និងសមភាគី លោក Hegseth នឹងពិភាក្សាគ្នាអំពីការត្រៀមលក្ខណៈការពារជាតិ ប្រឆាំងនឹងកូរ៉េខាងជើង និងកិច្ចសហប្រតិបត្តិការលើសន្តិសុខក្នុងតំបន់ រួមទាំងប្រព័ន្ធការពារតាមអ៊ីនធឺណិត និងមីស៊ីល។

លើសពីនេះ លោក Hegseth ត្រូវរំពឹងថានឹងចុះទៅពិនិត្យមើលភូមិបទឈប់បាញ់ ឈ្មោះ Panmunjom នៅតំបន់គ្មានយោធា (DMZ) តាមព្រំដែនរបស់កូរ៉េខាងជើង ជាមួយនឹងភូមិ Ahn របស់កូរ៉េខាងត្បូង។

ទាក់ទងនឹងកងទ័ពអាមេរិក — ទីក្រុងវ៉ាស៊ីនតោន កំពុងពិចារណាធ្វើឱ្យតួនាទីរបស់ទាហានអាមេរិក ២៨.៥០០នាក់ នៅក្នុងកូរ៉េខាងត្បូង កាន់តែមានភាពបត់បែន ជាមួយនឹងគោលបំណងរក្សាតុល្យភាពនៃអំណាចនៅអាស៊ី។ ក្រុមមន្ត្រីអាមេរិក ធ្លាប់បង្ហើបពីផែនការផ្ដល់ភាពបត់បែនឱ្យកងកម្លាំងអាមេរិក ដើម្បីអាចមានលទ្ធភាពធ្វើប្រតិបត្តិការក្រៅឧបទ្វីបកូរ៉េ ក្នុងការឆ្លើយតបនឹងការគំរាមកំហែងទូលំទូលាយ៕