មនុស្សរាប់លាននាក់នៅទូទាំងប្រទេសស៊ូដង់ដែលរងការបំផ្លិចបំផ្លាញដោយសង្រ្គាម ជាពិសេសផ្នែកខាងលិចរបស់ប្រទេស នៅតែត្រូវការជំនួយមនុស្សធម៌យ៉ាងខ្លាំង ខណៈឧត្តមសេនីយ៍សំខាន់ៗ មិនបង្ហាញពីបំណងចង់បញ្ចប់សង្រ្គាមស៊ីវិល ក្នុងពេលមានអំពើហិង្សា និងការសម្លាប់ ដែលនៅតែបន្តក្នុងទីក្រុង el-Fasher នៃរដ្ឋ North Darfur ។

ទីភ្នាក់ងារជំនួយអន្តរជាតិ កាលពីថ្ងៃអាទិត្យ បានអំពាវនាវឲ្យកងកម្លាំងប្រដាប់អាវុធស៊ូដង់(SAF) និងកងកម្លាំងគាំទ្ររហ័សយោធាប៉ារ៉ា(RSF) ជួយសម្រួលដល់ការបង្កើនលំហូរជំនួយ ខណៈផែនទីបង្ហាញផ្លូវរបស់អ្នកសម្រុះសម្រួល បានបរាជ័យក្នុងការបង្កើតបទឈប់បាញ់រហូតមកដល់ពេលនេះ។

មួយសប្តាហ៍បន្ទាប់ពីកម្លាំងយោធាប៉ារ៉ា ដណ្ដើមយកបានទីក្រុង el-Fasher រដ្ឋធានីនៃរដ្ឋ North Darfur បន្ទាប់ពីការហ៊ុមព័ទ្ធរយៈពេល១៨ខែ និងយុទ្ធនាការទុរ្ភិក្ស ស្ថានភាពនៅតែជាមហន្តរាយ។ ជនស៊ីវិលរាប់ម៉ឺននាក់នៅតែត្រូវបានគេជឿថាជាប់នៅក្នុងទីក្រុងធំចុងក្រោយមួយនេះក្នុងតំបន់ភាគខាងលិចទីក្រុង Darfur ដែលធ្លាក់ចូលទៅក្នុងដៃកងកម្លាំងគាំទ្ររហ័ស(RSF) ខណៈមនុស្សរាប់ពាន់នាក់ទៀតមិនត្រូវបានរាប់បញ្ចូលក្រោយពីការភៀសខ្លួនពីទីក្រុង el-Fasher ។

និយាយទៅកាន់សារព័ត៌មាន Al Jazeera ពីទីក្រុង Tawila មន្ត្រីទីភ្នាក់ងារជំនួយដែលមានមូលដ្ឋាននៅប្រទេសបារាំងបាននិយាយថា មានមនុស្សតែពីរបីរយនាក់ប៉ុណ្ណោះដែលបានមកដល់ទីក្រុងក្នុងរយៈពេលប៉ុន្មានថ្ងៃនេះ។