កីឡាជាតិ៖ ក្រសួងអប់រំ យុវជន និងកីឡាបានប្រកាសរៀបចំព្រឹត្តិការណ៍កីឡាធំៗចំនួន ៥ សម្រាប់ឆ្នាំ២០២២ ក្នុងនោះក៏មានការប្រកួតកីឡាជាតិលើកទី៣ ផងដែរដែលគ្រោងនឹងរៀបចំការប្រកួតពីថ្ងៃទី១៧ ដល់ថ្ងៃទី២៨ ខែវិច្ឆិកាចុងឆ្នាំនេះ។ ក្រោយរៀបចំបាន ២លើក កាលពីឆ្នាំ២០១៦ និងឆ្នាំ២០១៨ ព្រឹត្តិការណ៍កីឡាជាតិលើកទី៣ ដែលត្រូវរៀបចំកាលពីឆ្នាំ២០២០ ត្រូវបានសម្រេចលុបចោល ក្រោយផ្ទុះជំងឺរាតត្បាលជាសកលកូវីដ-១៩ រហូតមកទល់ពេលនេះទើបក្រសួងអប់រំបានប្រកាសរៀបចំឡើងវិញ ជាមួយការបន្ដព្រឹត្តិការណ៍ប្រកួតលើកទី៣ ដដែល។
ព្រឹត្តិការណ៍កីឡាជាតិត្រូវបានរៀបចំឡើងក្រោយទទួលបានការអនុញ្ញាត និងគាំទ្រពីរាជរដ្ឋាភិបាល ដើម្បីដកស្រង់បទពិសោធន៍ ពង្រឹងសមត្ថភាពមន្ដ្រីបច្ចេកទេស និងកីឡាករ-កីឡាការិនី ក៏ដូចជាការរៀបចំហេដ្ឋារចនាសម្ព័ន្ធកីឡានានា សម្រាប់ត្រៀមធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣។ ជាក់ស្ដែងការត្រឡប់មកវិញនៃការប្រកួតកីឡាជាតិលើកទី៣ នាចុងឆ្នាំនេះក៏ត្រូវបានកំណត់ទីតាំងប្រកួត ដូចទៅនឹងទីតាំងដែលគណៈកម្មាធិការជាតិ CAMSOC បានកំណត់សម្រាប់ត្រៀមរៀបចំការប្រកួតកីឡាស៊ីហ្គេមឆ្នាំ២០២៣ ដែរ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត ខេត្តកែប និងខេត្តកំពង់ស្ពឺ។ តាមការបញ្ជាក់ក្នុងសេចក្ដីជូនដំណឹងរបស់ក្រសួងអប់រំ យុវជន និងកីឡា សម្រាប់ការប្រកួតកីឡាជាតិលើកទី៣ នឹងរៀបចំទ្រង់ទ្រាយធំដោយនឹងរៀបចំការប្រកួតលើ ៣៩ប្រភេទកីឡា និងកីឡាប៉ារ៉ាឡាំពិក ឬកីឡាជនពិការ ៧ប្រភេទកីឡា ដែលការរៀបចំនេះក៏ត្រូវបានគេមើលឃើញយកតាមលំនាំស៊ីហ្គេម និងអាស៊ានប៉ារ៉ាហ្គេមផងដែរ។
ដោយឡែកព្រឹត្តិការណ៍ ៤ផ្សេងទៀតរួមមានការប្រកួតកីឡាសិស្សបឋម និងមធ្យមសិក្សាជ្រើសរើសជើងឯកថ្នាក់រាជធានី-ខេត្តពីខែមករា ដល់ខែមីនា, ការប្រកួតកីឡាសិស្សបឋមសិក្សាថ្នាក់ជាតិពីថ្ងៃទី២៩ ខែមេសា ដល់ថ្ងៃទី៨ ខែឧសភា, ការប្រកួតកីឡានិស្សិតជ្រើសរើសជើងឯកថ្នាក់គ្រឹះស្ថានឧត្តមសិក្សា និងមធ្យមសិក្សាបច្ចេកទេសពីខែកុម្ភៈដល់ខែមិថុនា និងការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិពីថ្ងៃទី២១ ដល់ថ្ងៃទី៣០ ខែមិថុនា ឆ្នាំ២០២២៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
