ប្រធានាធិបតីអាមេរិក លោក Donald Trump បាននិយាយថា បន្ទះឈីបបញ្ញាសិប្បនិម្មិត AI កម្រិតខ្ពស់បំផុត របស់ក្រុមហ៊ុនបច្ចេកវិទ្យាខ្នាតយក្ស Nvidia នឹងត្រូវបម្រុងទុកសម្រាប់តែក្រុមហ៊ុនសហរដ្ឋអាមេរិកប៉ុណ្ណោះ ហើយប្រទេសដទៃទៀត រួមទាំងចិន មិនអាចយកបាននោះទេ។

ក្នុងកិច្ចសម្ភាសន៍មួយដែលចាក់ផ្សាយកាលពីថ្ងៃអាទិត្យ (២ វិច្ឆិកា) លើកញ្ចក់ទូរទស្សន៍ CBS និងនៅក្នុងការអត្ថាធិប្បាយទៅកាន់អ្នកសារព័ត៌មានលើយន្តហោះ Air Force One — លោក Trump បាននិយាយថា មានតែអតិថិជនរបស់សហរដ្ឋអាមេរិកប៉ុណ្ណោះ ដែលគួរតែមានលទ្ធភាពប្រើប្រាស់បន្ទះឈីប Blackwell ទំនើបរបស់ Nvidia ដែលជាក្រុមហ៊ុនអាមេរិកដ៏មានតម្លៃបំផុតរបស់ពិភពលោក គិតតាមដោយមូលធនប័ត្រទីផ្សារ (ពោលគឺតម្លៃទីផ្សារភាគហ៊ុនសរុប គិតជាទឹកប្រាក់)។

លោកបានប្រាប់ CBS ថា "ឈីបទំនើបបំផុត នឹងមិនអនុញ្ញាតឱ្យនរណាម្នាក់មាននោះឡើយ ក្រៅពីសហរដ្ឋអាមេរិក"។ ការលើកឡើងនេះបានបង្ហាញថា លោក Trump អាចនឹងដាក់កំហិតកាន់តែតឹងរ៉ឹងជុំវិញបន្ទះឈីប AI ទំនើបៗ ពោលគឺខ្លាំងជាងអ្វីដែលក្រុមមន្ត្រីវ៉ាស៊ីនតោនធ្លាប់បង្ហើបនាពេលកន្លងមក ខណៈចិន និងប្រជាជាតិផ្សេងទៀតនៃពិភពលោក អាចប្រឈមនឹងលទ្ធភាពនៃការរារាំងមិនឱ្យប្រើប្រាស់ឈីបពាក់កណ្ដាលចម្លងទំនើបបំផុតរបស់អាមេរិក។

សំណួរជាច្រើននៅតែមានអំពីថា តើលោក Trump នឹងអនុញ្ញាតឱ្យមានការនាំចេញបន្ទះឈីប Blackwell កម្រិតទាបទៅកាន់ប្រទេសចិន ឬទេ ព្រោះលោកធ្លាប់បង្ហើបថា លោកអាចនឹងអនុញ្ញាតឱ្យមានការលក់បែបនេះ៕