ឧបនាយករដ្ឋមន្ត្រីរុស្ស៊ី លោក Dmitry Chernyshenko បានថ្លែងនៅក្នុងសម័យប្រជុំពេញអង្គនៃកិច្ចប្រជុំលើកទី ២៩ នៃគណៈកម្មការរុស្ស៊ី-ចិនសម្រាប់រៀបចំកិច្ចប្រជុំទៀងទាត់របស់ប្រមុខរដ្ឋាភិបាល ដែលបានធ្វើឡើង ក្នុងអំឡុងពេលទស្សនកិច្ចការងាររបស់លោកទៅកាន់ប្រទេសចិនថា ការពង្រឹងទំនាក់ទំនងមិត្តភាព និងកិច្ចសហប្រតិបត្តិការជាយុទ្ធសាស្ត្រជាមួយប្រទេសចិន គឺជាអាទិភាពនៃគោលនយោបាយការបរទេសរបស់រុស្ស៊ី។ 

លោកបាននិយាយថា៖«ការពង្រឹងភាពជាដៃគូដ៏ទូលំទូលាយ ស្មើភាព និងជឿទុកចិត្ត និងកិច្ចសហប្រតិបត្តិការជាយុទ្ធសាស្ត្រជាមួយប្រទេសចិនដែលជាសម្ព័ន្ធមិត្ត គឺជាអាទិភាពនៃគោលនយោបាយការបរទេសរបស់រុស្ស៊ី»។

លោកឧបនាយករដ្ឋមន្ត្រី បានរំលឹកថា ជាការបញ្ជាក់ពីភាពជាដៃគូនេះ ប្រមុខរដ្ឋទាំងពីរ គឺប្រធានាធិបតី    រុស្ស៊ី លោក វ្ល៉ាឌីមៀ ពូទីន (Vladimir Putin០ និងប្រធានាធិបតីចិន លោក ស៊ី ជីនពីង (Xi Jinping) បានរៀបចំកិច្ចប្រជុំផ្ទាល់ចំនួនពីរលើក នៅឆ្នាំនេះ ដែលក្នុងអំឡុងពេលនោះ ពួកគេបានបញ្ជាក់ពីភារកិច្ចសម្រាប់ពង្រីកកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។

លោក Chernyshenko បានសង្កត់ធ្ងន់ថា៖«ការសន្ទនារបស់ពួកគេ មានលក្ខណៈជាប្រព័ន្ធ និងទៀងទាត់ជាក់សែ្តង ដែលត្រូវបានបង្ហាញដោយការជឿទុកចិត្តកម្រិតខ្ពស់ និងការយោគយល់គ្នាទៅវិញទៅមក»។

លោកក៏បានបញ្ជាក់ផងដែរថា ប្រទេសចិន គឺជាដៃគូសំខាន់របស់រុស្ស៊ី នៅលើឆាកអន្តរជាតិ៕