ការប្រយុទ្ធគ្នា ដើម្បីគ្រប់គ្រងទីក្រុងមជ្ឈមណ្ឌលយុទ្ធសាស្រ្ត Pokrovsk ស្ថិតនៅតំបន់ភាគខាងកើតអ៊ុយក្រែន កាន់តែតានតឹងខ្លាំង ក្នុងនោះក្រសួងការពារជាតិរុស្ស៊ី អះអាងថា ពួកគេបានកម្ចាត់កងកម្លាំងពិសេសរបស់អ៊ុយក្រែនដែលបានបញ្ជូនឲ្យជួយការពារតំបន់នោះ ។

នៅក្នុងរយៈពេលជាច្រើនសប្តាហ៍កន្លងមកនេះ អង្គភាពរុស្ស៊ី បានចាប់ផ្តើមជ្រៀតចូលទៅក្នុងទីក្រុង Pokrovsk ដោយខ្លួនឯង ហើយនិងបានបិទផ្លូវផ្គត់ផ្គង់សំខាន់ដែលប្រើប្រាស់ដើម្បីរក្សាកងកម្លាំងអ៊ុយក្រែននៅក្នុងទីក្រុងមួយនេះ ។

យោងតាមការអះអាងរបស់ក្រសួងការពារជាតិរុស្ស៊ី បានឲ្យដឹងថា កងកម្លាំងពិសេសអ៊ុយក្រែន បានចុះតាមឧទ្ធម្ភាគចក្រនៅតំបន់ជាយក្រុងភាគពាយ័ព្យទីក្រុង Pokrovsk ។ រូបភាពវីដេអូឃ្លីបចែករំលែងដោយបណ្តាញព័ត៌មានសង្គមក្រៅផ្លូវការ Telegramរបស់រុស្ស៊ី ឃើញទាហានអ៊ុយក្រែន ចុះពីលើឧទ្ធម្ភាគចក្រ Blackhawk ។

ក្រសួងការពារជាតិរុស្ស៊ី អះអាងថា ទាហានអ៊ុយក្រែន ១១នាក់ ដែលបានចុះពីលើឧទ្ធម្ភាគចក្រ ត្រូវបានសម្លាប់ ។ ទោះបីជាយ៉ាងណាក៏ដោយ គេមិនទាន់ដឹងច្បាស់នោះទេថាតើ បេសកកម្មមួយនេះ បានកើតឡើងនៅពេលណានោះ ។

ប្រភពព័ត៌មានពីក្រុមចារកម្មអ៊ុយក្រែន បាននិយាយប្រាប់ CNNថា អំណះអំណាងរបស់រុស្ស៊ី មិនពិតនោះទេ ។ ប្រភពបន្តថា កិច្ចខិតខំប្រឹងប្រែងធ្វើឲ្យមានស្ថិរភាព ដឹកនាំដោយប្រធានក្រុមចារកម្មការពារជាតិអ៊ុយក្រែនលោក Kyrylo Budanov នៅតែបន្តក្នុងទីក្រុង Pokrovsk ៕