ប្រទេសសមាជិកចំនួន ៨ របស់សម្ព័ន្ធភាព OPEC+ បានយល់ព្រមកែសម្រួលផលិតកម្មប្រេងរបស់ពួកគេដោយបន្ថែមទិន្នផល ១៣៧.០០០បារ៉ែល ក្នុងមួយថ្ងៃ ដែលនឹងចាប់ផ្តើមក្នុងខែធ្នូ ឆ្នាំ២០២៥។

ចំណាត់ការនេះ គឺជាផ្នែកមួយនៃការកាត់បន្ថយដោយស្ម័គ្រចិត្តរបស់ក្រុមដែលត្រូវបានប្រកាសពីមុន ដោយមានចំនួនសរុប ១,៦៥លានបារ៉ែល ក្នុងមួយថ្ងៃ ដែលត្រូវបានណែនាំជាលើកដំបូង ក្នុងខែមេសា ឆ្នាំ២០២៣។

ប្រទេសទាំង៨ រួមមានអារ៉ាប៊ីសាអ៊ូឌីត រុស្ស៊ី អ៊ីរ៉ាក់ អេមីរ៉ាតអារ៉ាប់រួម គុយវ៉ែត កាហ្សាក់ស្ថាន អាល់ហ្សេរី និងអូម៉ង់ បានបញ្ជាក់ជាថ្មីពីការប្តេជ្ញាចិត្តរបស់ពួកគេ ក្នុងការរក្សាស្ថិរភាពនៅក្នុងទីផ្សារប្រេងពិភពលោក ចំពេលមានមូលដ្ឋានគ្រឹះទីផ្សារវិជ្ជមាន និងទស្សនវិស័យសេដ្ឋកិច្ចពិភពលោកមានស្ថិរភាព។ ប្រទេសទាំងនោះបានលើកឡើងថា ការកែតម្រូវនេះស្របតាមលក្ខខណ្ឌប្រសើរឡើងទាំងនេះ។

ប្រទេសទាំង៨ ដែលទាំងអស់ជាផ្នែកនៃក្រុម OPEC+ ដែលពីមុនបានប្រកាសពីការផ្លាស់ប្តូរផលិតកម្មដោយស្ម័គ្រចិត្តបន្ថែម ក្នុងខែមេសា និងវិច្ឆិកា ឆ្នាំ២០២៣ បានបើកកិច្ចប្រជុំអនឡាញមួយ កាលពីថ្ងៃអាទិត្យ (ទី២ ខែវិច្ឆិកា) ដើម្បីពិនិត្យមើលការវិវត្តទីផ្សារបច្ចុប្បន្ន និងវាយតម្លៃការរំពឹងទុកនាពេលអនាគត។

ជាមួយគ្នានេះ បណ្តាប្រទេសទាំងនេះ បានសង្កត់ធ្ងន់ថា ការកាត់បន្ថយផលិតកម្មដែលបានព្រមព្រៀងគ្នាពីមុនចំនួន ១,៦៥លានបារ៉ែល ក្នុងមួយថ្ងៃ អាចត្រូវបានស្ដារឡើងវិញដោយផ្នែក ឬពេញលេញ តាមពេលវេលា អាស្រ័យលើលក្ខខណ្ឌទីផ្សារ។ ប្រទេសទាំងអស់ក៏បានសន្យាផងដែរថា នឹងបន្តតាមដានយ៉ាងដិតដល់ និងវាយតម្លៃនិន្នាការទីផ្សារប្រេង៕