សារព័ត៌មានរ៉យទ័រ បានរាយការណ៍ដោយដកស្រង់រូបថតផ្កាយរណបថា សហរដ្ឋអាមេរិក កំពុងកសាងឡើងនូវមូលដ្ឋានទ័ពជើងទឹក ដែលត្រូវបានគេបោះបង់ចោលជាយូរមកហើយ នៅក្នុងដែនដី Puerto Rico ដែលជាក់ស្តែងកំពុងរៀបចំសម្រាប់ប្រតិបត្តិការយោធាដែលអាចកើតមាន នៅក្នុងប្រទេសវ៉េណេហ្ស៊ុយអេឡា។ 

យោងតាមទីភ្នាក់ងារនេះ ការងារសាងសង់នៅអតីតមូលដ្ឋានទ័ពជើងទឹក Roosevelt Roads ក្នុងដែនដី Puerto Rico ដែលត្រូវបានបិទជាង ២០ឆ្នាំមុន បានចាប់ផ្តើមនៅថ្ងៃទី ១៧ ខែកញ្ញា នៅពេលដែលប្រតិបត្តិការសម្អាត និងជួសជុលផ្លូវនៅព្រលានយន្តហោះ ដែលរហូតដល់ផ្លូវយន្តហោះរត់ បានចាប់ផ្តើម។ ក្រៅពីនេះ សហរដ្ឋអាមេរិក កំពុងពង្រីកហេដ្ឋារចនាសម្ព័ន្ធអាកាសយានដ្ឋានស៊ីវិល នៅតំបន់ Puerto Rico និងនៅលើកោះ Saint Croix ដែលជាប្រជុំកោះ Virgin របស់សហរដ្ឋអាមេរិក។ ទឹកដីទាំងនេះ មានទីតាំងស្ថិតនៅចម្ងាយប្រហែល ៥០០ ម៉ាយ (ប្រហែល ៨០០ គីឡូម៉ែត្រ) ពីប្រទេសវ៉េណេហ្ស៊ុយអេឡា។

ទីក្រុងវ៉ាស៊ីនតោន បានចោទប្រកាន់ទីក្រុងការ៉ាកាសថា មិនបានធ្វើអ្វីគ្រប់គ្រាន់ ដើម្បីប្រយុទ្ធប្រឆាំងនឹងការរត់ពន្ធគ្រឿងញៀន។ ក្រោមលេសនេះ សហរដ្ឋអាមេរិក បានដាក់ពង្រាយកងកម្លាំងយ៉ាងច្រើន ទៅកាន់តំបន់ការ៉ាអ៊ីបនេះ ។ កាសែត Miami Herald បានរាយការណ៍ពីមុនដោយដកស្រង់ប្រភពថា៖«រដ្ឋបាលរបស់លោក ត្រាំ បានសម្រេចចិត្តវាយប្រហារទីតាំងយោធា នៅក្នុងប្រទេសវ៉េណេហ្ស៊ុយអេឡា ហើយការវាយប្រហារ អាចកើតឡើងនៅពេលណាក៏បាន»។ ទន្ទឹមនឹងនេះ ថ្លែងទៅកាន់អ្នកយកព័ត៌មាន ប្រធានាធិបតីអាមេរិកលោក ដូណាល់ ត្រាំ (Donald Trump) បានបដិសេធថា លោកមិនបានសម្រេចចិត្តវាយប្រហារលើប្រទេសវ៉េណេហ្ស៊ុយអេឡាទេ៕