ប្រធានាធិបតីទួរគី លោក Recep Tayyip Erodgan បាននិយាយនៅថ្ងៃចន្ទនេះថា ក្រុមហាម៉ាស «ប្តេជ្ញាចិត្ត» ក្នុងការប្រកាន់ខ្ជាប់នូវបទឈប់បាញ់ហ្កាហ្សា ដោយបន្ថែមថា វាមានសារៈសំខាន់ណាស់ដែលប្រទេសមូស្លីមដើរតួនាទីនាំមុខគេ ក្នុងការកសាងទឹកដីប៉ាឡេស្ទីនឡើងវិញ។

លោក Erdogan បានប្រាប់ប្រតិភូមកពីអង្គការរដ្ឋឥស្លាម (OIC) ដែលបានជួបជុំគ្នា នៅទីក្រុងអ៊ីស្តង់ប៊ុលសម្រាប់កិច្ចប្រជុំកំពូលសហប្រតិបត្តិការសេដ្ឋកិច្ច COMCEC ប្រចាំឆ្នាំរបស់ពួកគេថា «វាហាក់ដូចជាក្រុមហាម៉ាស មានការប្តេជ្ញាចិត្តយ៉ាងមុតមាំ ក្នុងការប្រកាន់ខ្ជាប់នូវកិច្ចព្រមព្រៀង»។

ការអត្ថាធិប្បាយរបស់លោក បានកើតឡើង នៅពេលដែលប្រទេសទួរគី បានត្រៀមខ្លួនរួចជាស្រេច ដើម្បីធ្វើជាម្ចាស់ផ្ទះទទួលរដ្ឋមន្ត្រីការបរទេសនៃប្រទេសអារ៉ាប៊ីសាអ៊ូឌីត កាតា អារ៉ាប់រួម ហ្ស៊កដានី ប៉ាគីស្ថាន និងឥណ្ឌូនេស៊ីសម្រាប់ការពិភាក្សាអំពីការកសាងតំបន់ហ្កាហ្សាឡើង ខណៈដែលការភ័យខ្លាចកាន់តែខ្លាំងឡើងចំពោះបទឈប់បាញ់ នៅថ្ងៃទី ១០ ខែតុលាដ៏រង្គោះរង្គើនោះ។

ការពិភាក្សា នឹងចាប់ផ្តើមនៅម៉ោងប្រហែល ១១:00 ម៉ោងសាកល នៅសណ្ឋាគារអ៊ីស្តង់ប៊ុល ដោយមានសន្និសីទសារព័ត៌មានមួយ ត្រូវបានធ្វើឡើង ប៉ុន្មានម៉ោងក្រោយមក៕