ប្រធានាធិបតីម៉ិកស៊ិកលោកស្រី Claudia Sheinbaum សន្យាថា ត្រូវតែមានយុត្តិធម៌សម្រាប់ការធ្វើឃាតលោកអភិបាលក្រុង Carlos Manzo ដែលជាអ្នករិះគន់ឥតសំចៃមាត់ម្នាក់លើឧក្រិដ្ឋរៀបចំទុក និងអំពាវនាវដល់រដ្ឋាភិបាលរបស់លោក ធ្វើរឿងបន្ថែមទៀត ដើម្បីការពាររូបលោក និងមនុស្សដទៃទៀត ។

លោក Manzo វ័យ ៤០ឆ្នាំ ត្រូវបានគេបាញ់សម្លាប់កាលពីថ្ងៃសៅរ៍ ខណៈពេលចូលរួមពិធីបុណ្យទិវាអុជភ្លើងទៀនដល់អ្នកស្លាប់ នៅមជ្ឈមណ្ឌលទីក្រុង Uruapan ស្ថិតក្នុងរដ្ឋភាគខាងលិច Michoacan ដែលញាំញីដោយសារអំពើហិង្សា ។

ក្រសួងសន្តិសុខម៉ិកស៊ិកនិយាយកាលពីថ្ងៃសៅរ៍ថា ជនសង្ស័យ ២នាក់ ត្រូវបានចាប់ខ្លួន និងជនសង្ស័យទី ៣ បានស្លាប់ ។

លោកស្រី Sheinbaum កោះហៅឲ្យមានជំនួបបន្ទាន់របស់គណៈរដ្ឋមន្រ្តីសន្តិសុខរបស់លោកស្រីកាលពីព្រឹកថ្ងៃអាទិត្យ ហើយក្រោយមកលោកស្រី បានថ្កោលទោសការសម្លាប់លោក Manzo នៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម X ។

លោកស្រី Sheinbaum និយាយថា ពួកយើងសូមធ្វើការបញ្ជាក់ឡើងវិញពីការប្តេជ្ញាចិត្តរបស់ពួកយើង ក្នុងការបន្តកិច្ចខិតខំប្រឹងប្រែងរបស់ពួកយើង ដើម្បីសម្រេចឲ្យបានសន្តិភាព និងសន្តិសុខ ដោយគ្មាននិទណ្ឌភាព និងមានយុត្តិធម៌ពេញលេញ ។

រដ្ឋមន្រ្តីសន្តិសុខម៉ិកស៊ិកលោក Omar Garcia Harfuch បានសន្យាផងដែរ ក្នុងការស្វែងរកយុត្តិធម៌សម្រាប់លោក Manzo ។ 

ថ្លែងទៅកាន់សន្និសីទសារព័ត៌មាននៅទីក្រុង Mexico City លោក Harfuch និយាយថា ក្រុមស៊ើបអង្កេតកំពុងវិភាគកាមេរ៉ាសុវត្ថិភាព ដើម្បីតាមដានជនល្មើលដែលឆ្លៀតយកប្រយោជន៍ពីភាពងាយរងគ្រោះ អំឡុងពេលមានមនុស្សច្រើនកុះករ ៕