ប្រធានាធិបតីសាធារណរដ្ឋប្រជាធិបតេយ្យកុងហ្គោ លោក Felix Tshisekedi បានថ្លែងថា ការចរចាសន្តិភាពរវាងរដ្ឋាភិបាលនៃសាធារណរដ្ឋប្រជាធិបតេយ្យកុងហ្គោ (DRC) និងក្រុមឧទ្ទាមចលនា M23 នឹងបន្តឡើងវិញ នៅសប្តាហ៍ក្រោយ នៅទីក្រុងដូហា ប្រទេសកាតា។ 

យោងតាមសេចក្តីថ្លែងការណ៍ដែលចេញផ្សាយកាលពីថ្ងៃអាទិត្យ ដោយការិយាល័យប្រធានាធិបតីកុងហ្គោ លោក Tshisekedi បានបញ្ជាក់ជាថ្មីថា សាធារណរដ្ឋប្រជាធិបតេយ្យកុងហ្គោ នៅតែប្តេជ្ញាចិត្តចំពោះមធ្យោបាយនយោបាយ និងការទូត ដើម្បីបញ្ចប់ជម្លោះ នៅក្នុងខេត្តភាគខាងកើត ខណៈដែលការពារ អធិបតេយ្យភាព និងបូរណភាពទឹកដីរបស់ប្រទេសនេះ។

ទីក្រុងដូហា នៅតែជាបណ្តាញប្រតិបត្តិការតែមួយគត់នៃការសន្ទនារវាងទីក្រុងគីនសាសា និងក្រុម M23 អស់រយៈពេលជាច្រើនខែ។ កាលពីខែកក្កដា ទីក្រុង Kinshasa និងក្រុម M23 បានចុះហត្ថលេខាលើសេចក្តីប្រកាសគោលការណ៍នៅទីក្រុងដូហា ជាផែនទីបង្ហាញផ្លូវដែលដំបូងឡើយបានកំណត់កាលបរិច្ឆេទចាប់ផ្តើមសម្រាប់ការចរចាមិនឲ្យលើសពីថ្ងៃទី ៨ ខែសីហា និងការចុះហត្ថលេខាលើកិច្ចព្រមព្រៀងសន្តិភាពមុនថ្ងៃទី ១៨ ខែសីហា។ ពេលវេលាទាំងនេះ បានកន្លងផុតទៅដោយមិនទាន់បានសម្រេច។

លោក Tshisekedi ដែលបានមកដល់ទីក្រុងដូហាកាលពីថ្ងៃអាទិត្យ ដើម្បីចូលរួមក្នុងកិច្ចប្រជុំកំពូលពិភពលោកលើកទី ២ សម្រាប់ការអភិវឌ្ឍសង្គម ដែលគ្រោងធ្វើឡើង នៅថ្ងៃទី ៤-៦ ខែវិច្ឆិកា ក៏បានសរសើរការចូលរួមរបស់មេដឹកនាំកាតាលោក Sheikh Tamim bin Hamad Al Thani ក្នុងការពិភាក្សាជាមួយក្រុម M23 ផងដែរ៕