យ៉ាងហោចណាស់មនុស្ស ១៥នាក់ ដែលភាគច្រើនជាកុមារ កំពុងបាត់ខ្លួន ហើយទំនងជាមិនមានជីវិតនោះទេ ក្រោយទឹកជំនន់ និងបំណាក់ដី បានកើតមាននៅតំបន់ Papua ចុងភាគខាងកើតរបស់ប្រទេសឥណ្ឌូនេស៊ី បន្ទាប់ពីភ្លៀងធ្លាក់ខ្លាំង។

ស្នងការនគរបាលនៃតំបន់ដាច់ស្រយាល Nduga លោក Alfredo Agustinus Rumbiak បានប្រាប់សារព័ត៌មានរ៉យទ័រថា ជនរងគ្រោះ ១៣នាក់ គឺជាកុមារដែលមានអាយុចន្លោះពី ៨ ទៅ ១៧ឆ្នាំ។ លោកបានបន្តថា កុមារទាំងនោះបានធ្វើដំណើរទៅផ្ទះសម្បែងវិញ បន្ទាប់ពីឈប់លេងកីឡាបាល់ទះ ហើយបានព្យាយាមឆ្លងទន្លេនៅពេលទឹកជំនន់បានកើតឡើង។

ដំបូងឡើយ ពួកគេបាននាំគ្នាំឈរនៅលើថ្មធំៗ ប៉ុន្តែចរន្តទឹកគឺខ្លាំងពេក ហើយពួកគេត្រូវបានទឹកហូរនាំទៅ។ លោក Rumbiak បានប្រាប់ទៀតថា ដុំថ្មមួយចំនួនបានធ្លាក់សង្កត់ពួកក្មេងទាំងនោះ។

លោក Rumbiak បានបន្ថែមថា អ្នកស្រុក នគរបាល និងបុគ្គលិកយោធា ព្រមទាំងភ្នាក់ងារកាត់បន្ថយគ្រោះមហន្តរាយក្នុងតំបន់ កំពុងបន្តស្វែងរកជនរងគ្រោះ ប៉ុន្តែកិច្ចប្រឹងប្រែងរបស់ពួកគេ កំពុងជួបនឹងឧបសគ្គ ដោយសារសណ្ឋានដីតំបន់ភ្នំដ៏លំបាក។

លោក Rumbiak បានបញ្ជាក់ថា អាជ្ញាធរត្រូវការឧទ្ធម្ភាគចក្រ ដើម្បីធ្វើដំណើរទៅដល់ទីតាំងនោះ ឬបើមិនដូច្នោះទេ ត្រូវធ្វើដំណើររយៈពេល ៨ម៉ោង ពីទីក្រុងដែលនៅជិតបំផុត៕