រដ្ឋមន្ត្រីការបរទេសទួរគី លោក Hakan Fidan បានរិះគន់អ៊ីស្រាអែល ដោយនិយាយថា ប្រទេសនេះកំពុងបំពានលើកិច្ចព្រមព្រៀងបទឈប់បាញ់ជាមួយក្រុមហាម៉ាស។ លោកក៏បានអំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិ ជជែកដេញដោលអំពីផែនការបញ្ជូនកងកម្លាំងរក្សាស្ថិរភាពអន្តរជាតិទៅកាន់តំបន់ហ្កាហ្សា។

លោក Fidan បាននិយាយបន្ទាប់ពីកិច្ចប្រជុំនៅទីក្រុងអ៊ីស្តង់ប៊ុលកាលពីថ្ងៃចន្ទជាមួយអ្នកការទូតមកពីប្រទេសអារ៉ាប់និងប្រទេសដទៃទៀតថា សកម្មភាពរបស់អ៊ីស្រាអែលកំពុងរារាំងការដឹកជញ្ជូនជំនួយមនុស្សធម៌ក្នុងកម្រិតដែលត្រូវការ។ កិច្ចប្រជុំ ដែលប្រទេសទួរគីធ្វើជាម្ចាស់ផ្ទះ គឺដើម្បីពិភាក្សាអំពីការអនុវត្តកិច្ចព្រមព្រៀងបទឈប់បាញ់ ព្រមទាំងផែនការនាំមកនូវសន្តិភាពដល់តំបន់នេះ។

កិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាស បានចូលជាធរមានកាលពីថ្ងៃទី១០ ខែតុលា។ ប៉ុន្តែអ៊ីស្រាអែល បានបន្តវាយលុកតំបន់ហ្កាហ្សាដោយចោទប្រកាន់ក្រុមហាម៉ាសថាបានរំលោភលើកិច្ចព្រមព្រៀង។ រដ្ឋមន្ត្រីការបរទេសទួរគីក៏បានសង្កត់ធ្ងន់ផងដែរអំពីតម្រូវការសម្រាប់ក្រុមប្រឹក្សាសន្តិសុខអង្គការសហប្រជាជាតិដើម្បីកំណត់ភារកិច្ច និងសិទ្ធិអំណាចរបស់កងកម្លាំងស្ថិរភាពអន្តរជាតិ។ លោកបាននិយាយថា ប្រទេសនានាត្រូវយល់ពីបេសកកម្មដើម្បីសម្រេចថាតើត្រូវបញ្ជូនទាហានរបស់ខ្លួនឬយ៉ាងណា។

បណ្តាប្រទេសរួមមានទាំងទួរគី និងអេហ្ស៊ីប តាមសេចក្តីរាយការណ៍បានស្នើឱ្យចូលរួមក្នុងកងកម្លាំងរក្សាស្ថិរភាពអន្តរជាតិ។ ប៉ុន្តែអ៊ីស្រាអែល បានផ្តល់សញ្ញាថាខ្លួននឹងមិនអនុញ្ញាតឱ្យកងកម្លាំងទួរគី ចូលរួមក្នុងកម្លាំងនេះទេ។