ប្រធានាធិបតីលីបង់ លោក Joseph Aoun កាលពីថ្ងៃចន្ទ បានបញ្ជាក់ជាថ្មីនូវការប្តេជ្ញាចិត្តរបស់លោក ក្នុងការចរចាជាមួយអ៊ីស្រាអែល ដោយនិយាយថា ប្រទេសរបស់លោក «គ្មានជម្រើស» ក្នុងបញ្ហានេះទេ។

ទោះជាយ៉ាងណាក៏ដោយ លោកបាននិយាយថា៖«ការចរចា មិនត្រូវបានធ្វើឡើងជាមួយមិត្តភ័ក្តិ ឬសម្ព័ន្ធមិត្តទេ ប៉ុន្តែជាមួយសត្រូវ»។

«ភាសានៃការចរចា គឺសំខាន់ជាងភាសាសង្គ្រាម ដែលយើងបានឃើញអ្វីដែលប្រទេសនេះ បានធ្វើចំពោះយើង»។

ការិយាល័យប្រព័ន្ធផ្សព្វផ្សាយនៅវិមានប្រធានាធិបតី បានដកស្រង់សម្តីរបស់លោក Aoun ដោយបញ្ជាក់ជាថ្មីនូវការប្តេជ្ញាចិត្តរបស់លោកចំពោះ «ភាសាការទូតដែលបានអនុម័តដោយយើងទាំងអស់គ្នា ចាប់ពីប្រធានសភាលោក Nabih Berri រហូតដល់លោកនាយករដ្ឋមន្ត្រី Nawaf Salam»។

ប្រទេសលីបង់ នៅតែប្តេជ្ញាចិត្តចំពោះក្របខ័ណ្ឌនៃការចរចា «តាមរយៈគណៈកម្មាធិការយន្តការ» ដែលត្រូវបានកំណត់សម្រាប់តំណាងយោធា ជាមួយនឹងលទ្ធភាពនៃការរួមបញ្ចូលជនស៊ីវិល ស្របតាមសំណើរបស់អាមេរិកដែលដាក់ចេញកាលពីសប្តាហ៍មុនដោយលោកស្រី Morgan Ortagus ទៅកាន់មន្ត្រីលីបង់៕