ឧបនាយករដ្ឋមន្ត្រីរបស់ប្រទេសចិន លោក He Lifeng បាននិយាយនៅថ្ងៃអង្គារ ទី៤ ខែវិច្ឆិកានេះ ថា លោកសង្ឃឹមថា ទីក្រុងហុងកុងនឹងពង្រឹងកិច្ចសហប្រតិបត្តិការជាមួយវិស័យសេដ្ឋកិច្ចនិងហិរញ្ញវត្ថុរបស់ចិនដីគោក ដែលនឹងអនុញ្ញាតឱ្យទីក្រុងនេះលើកកម្ពស់ឋានៈរបស់ខ្លួនជាមជ្ឈមណ្ឌលហិរញ្ញវត្ថុពិភពលោក។ លោកបាននិយាយនៅក្នុងកិច្ចប្រជុំកំពូលវិនិយោគរបស់មេដឹកនាំហិរញ្ញវត្ថុសកលដែលបានរៀបចំឡើងដោយអាជ្ញាធររូបិយវត្ថុក្រុងហុងកុង។

តួនាទីរបស់ទីក្រុងហុងកុង ជាមជ្ឈមណ្ឌលហិរញ្ញវត្ថុសកលកំពុងស្ថិតក្នុងការចោទសួរ បន្ទាប់ពីការរឹតត្បិតជំងឺ COVID ដែលបានបិទព្រំដែនរបស់ខ្លួនរយៈពេលជិត៣ឆ្នាំ និងការអនុវត្តច្បាប់សន្តិសុខជាតិដែលដាក់ដោយប្រទេសចិនក្នុងឆ្នាំ២០២០។ 

ប្រមុខក្រុងហុងកុង លោក John Lee បាននិយាយក្នុងកិច្ចប្រជុំកំពូលថា មានការផ្តល់មូលប័ត្រជាសាធារណៈចំនួន៨០ក្នុងរយៈពេល១០ខែដំបូងនៃឆ្នាំ២០២៥នេះ ដែលបង្ហាញពីទីផ្សារមូលធនដែលមានភាពធន់របស់ទីក្រុង។