ទីស្នាក់ការប្រតិបត្តិការនៃតំបន់ជាប់ព្រំដែនរុស្ស៊ី បានរាយការណ៍ថា កងទ័ពអ៊ុយក្រែន បានព្យាយាមវាយប្រហារតំបន់ Belgorod របស់រុស្ស៊ី ដោយប្រើយានដ្រូនជាង ១២០ គ្រឿង កាលពីថ្ងៃអាទិត្យ។ 

ទីស្នាក់ការកណ្តាល បាននិយាយនៅក្នុងសេចក្តីថ្លែងការណ៍មួយថា ចន្លោះម៉ោង ៧:០០ ព្រឹកម៉ោង នៅទីក្រុងមូស្គូ (ម៉ោង ៤:០០ព្រឹក ម៉ោងសកល) នៅថ្ងៃទី ២ ខែវិច្ឆិកា និងម៉ោង ៧:០០ ព្រឹកម៉ោងនៅទីក្រុងមូស្គូ នៅថ្ងៃទី ៣ ខែវិច្ឆិកា ដ្រូនរបស់សត្រូវចំនួន ៤៣គ្រឿង ត្រូវបានបំផ្លាញ នៅពីខាងលើតំបន់នោះ។

នៅក្នុងស្រុក Valuiki យានដ្រូនចំនួន ១៧ គ្រឿង ក្នុងចំណោម ២៦ គ្រឿង ត្រូវបានបាញ់ទម្លាក់ ឬត្រូវធ្វើឲ្យគាំងដំណើរការ។ ជនស៊ីវិលស្ត្រីម្នាក់ ត្រូវបានសម្លាប់ នៅពេលដែលយានដ្រូនមួយគ្រឿង បានបំផ្ទុះ ហើយមនុស្សបីនាក់ផ្សេងទៀត បានរងរបួស។

នៅក្នុងក្រុង Graivoron មានតែដ្រូនចំនួន ៥គ្រឿង ក្នុងចំណោម ២៦ គ្រឿងប៉ុណ្ណោះ ដែលត្រូវបានគាំងដំណើរការ។ ស្ត្រីពីរនាក់ បានរងរបួស នៅពេលដែលដ្រូន ត្រូវបានបំផ្ទុះ ហើយជនស៊ីវិលម្នាក់ទៀត បានរងរបួស ដោយសារការវាយប្រហារដោយយានដ្រូន FPV លើរថយន្តរបស់គាត់។ ពួកគេទាំងអស់ កំពុងទទួលការព្យាបាល៕