អ្នកកាន់សាសនាស៊ីក នៅរដ្ឋ Punjab ភាគខាងជើងប្រទេសឥណ្ឌា បានចេញដំណើរទៅកាន់ប្រទេសប៉ាគីស្ថានដែលជិតខាងនៅថ្ងៃអង្គារ ទី០៤ ខែវិច្ឆិកានេះដើម្បីធ្វើធម្មយាត្រា រយៈពេលមួយខែបន្ទាប់ពីការប៉ះទង្គិចគ្នារវាងប្រទេសទាំងពីរក្រោយការវាយប្រហារនៅតំបន់កាស្មៀរ។ 

កាលពីថ្ងៃទី២២ ខែមេសា ក្រុមសកម្មប្រយុទ្ធ បានវាយប្រហារភ្ញៀវទេសចរនៅតំបន់កាស្មៀរប្រទេសឥណ្ឌា ដែលនាំឱ្យមានជម្លោះយោធារយៈពេលបួនថ្ងៃដ៏ខ្លាំងក្លារវាងឥណ្ឌានិងប៉ាគីស្ថានក្នុងខែឧសភា ជាការប៉ះទង្គិចគ្នាអាក្រក់បំផុតរវាងប្រទេសជិតខាងដែលមានអាវុធនុយក្លេអ៊ែរ ក្នុងរយៈពេលជិត៣ទសវត្សរ៍មកនេះ។

អ្នកដើរធម្មយាត្រាម្នាក់ និយាយថា អ្នកគោរពសាសនា នឹងចាប់ផ្តើមធ្វើដំណើររយៈពេល១០ថ្ងៃ ហើយនឹងទៅទស្សនាវិហារសាសនាស៊ីកប្រវត្តិសាស្ត្រជាច្រើនកន្លែងដែលបានបន្សល់ទុកក្នុងអំឡុងពេលបែងចែក។ លោក Navneet Kaur ជាអ្នកដើរធម្មយាត្រាម្នាក់ទៀតបាននិយាយថា «យើងអរគុណរដ្ឋាភិបាលដែលបានអនុញ្ញាតឱ្យយើងធ្វើធម្មយាត្រា»។

អ្នកកាន់សាសនាស៊ីកជាច្រើនមើលឃើញប្រទេសប៉ាគីស្ថានជាកន្លែងដែលសាសនារបស់ខ្លួនបានចាប់ផ្តើម ដែលស្ថាបនិក គឺលោក Guru Nanak កើតនៅឆ្នាំ១៤៦៩ នៅក្នុងភូមិតូចមួយនៅជិតទីក្រុង Lahore ប្រទេសប៉ាគីស្ថានភាគខាងកើត។