យោងតាមរដ្ឋបាលអាកាសចរណ៍សហព័ន្ធ(FAA) បានឱ្យដឹងថា អាកាសយានដ្ឋាននានានៅទូទាំងសហរដ្ឋអាមេរិក កំពុងជួបប្រទះការពន្យារពេលនិងការលុបចោលជើងហោះហើរយ៉ាងច្រើនវ៉ុល ដោយសារតែការកើនឡើងអវត្តមានពីអ្នកត្រួតពិនិត្យចរាចរណ៍ផ្លូវអាកាស ដែលស្ថិតនៅក្រោម «ភាពតានតឹងខ្លាំង និងការអស់ទឹកចិត្ត» ពីការបិទរដ្ឋាភិបាលសហរដ្ឋអាមេរិកដែលកំពុងនៅបន្ត។

ជើងហោះហើរអាមេរិកជាង ១៦.៧០០វ៉ុល ត្រូវបានពន្យារពេល ហើយជើងហោះហើរ ២.២៨២វ៉ុល ផ្សេងទៀតត្រូវបានលុបចោលកាលពីថ្ងៃចុងសប្តាហ៍ចាប់ពីថ្ងៃសុក្រដល់ថ្ងៃអាទិត្យ នេះបើយោងតាមគេហទំព័រ FlightAware ជាគេហទំព័ររបស់សហរដ្ឋអាមេរិកដែលផ្តល់ការតាមដានជើងហោះហើរក្នុងពេលវេលាជាក់ស្តែង។

ការពន្យារពេលជើងហោះហើរបានបន្តរហូតដល់ល្ងាចថ្ងៃច័ន្ទនៅសហរដ្ឋអាមេរិក ខណៈគេហទំព័រ FlightAware បានរាប់ការពន្យារពេលច្រើនជាង៤.០០០វ៉ុល និងលុបចោលចំនួន៦០០វ៉ុល នៅទូទាំងអាកាសយានដ្ឋានធំៗ។

រដ្ឋបាលអាកាសចរណ៍សហព័ន្ធ(FAA) បាននិយាយនៅលើបណ្តាញ X ថា ពាក់កណ្តាលនៃផ្នែកសំខាន់ៗរបស់ខ្លួននៅអាកាសយានដ្ឋានធំៗរបស់សហរដ្ឋអាមេរិកកំពុងជួបប្រទះកង្វះបុគ្គលិកដោយសារតែការបិទរដ្ឋាភិបាលដោយអវត្តមាននៅអាកាសយានដ្ឋានក្នុងតំបន់ទីក្រុងញូវយ៉កឈានដល់៨០ភាគរយ។

អ្នកត្រួតពិនិត្យចរាចរណ៍ផ្លូវអាកាសមានចំនួនជិត១៣.០០០នាក់នៅទូទាំងសហរដ្ឋអាមេរិក ត្រូវបានចាត់ថ្នាក់ជា «បុគ្គលិកសំខាន់» ខណៈពួកគេបានធ្វើការដោយគ្មានប្រាក់ឈ្នួលចាប់តាំងពីការបិទរដ្ឋាល ចាប់ផ្តើមកាលពីថ្ងៃទី១ ខែតុលា។