សេវាកម្មគ្រប់គ្រងចរាចរណ៍ផ្លូវអាកាសបែលហ្ស៊ិក និងអ្នកនាំពាក្យអាកាសយានដ្ឋាន និយាយថា អាកាសយានដ្ឋានក្រុងព្រុចសែល ត្រូវបានបិទដំណើរការបណ្តោះអាសន្ន ក្រោយប្រទះឃើញយានដ្រូនមួយគ្រឿង ។

អ្នកនាំពាក្យអាកាសយានដ្ឋានក្រុងព្រុចសែល និយាយថា បច្ចុប្បន្នគ្មានជើងហោះហើរចុះចត ឬហោះឡើងនោះទេ ហើយអ្នកស្រីក៏ពុំអាចស្មានដឹង ថាតើអាកាសយានដ្ឋាននឹងបិទរយៈពេលយូរប៉ុនណានោះទេ ។

អ្នកស្រីបន្តថា ជើងហោះហើរត្រូវបានផ្អាកបណ្តោះអាសន្ន ។ ពួកយើងកំពុងតាមដានស្ថានភាពយ៉ាងដិតដល់ ហើយពួកយើងនឹងធ្វើបច្ចុប្បន្នភាពឲ្យបានឆាប់តាមដែលអាចធ្វើទៅបាន ពេលដែលពួកយើងទទួលបានព័ត៌មានបន្ថែមទៀត ។ 

អ្នកស្រីនិយាយទៀតថា អ្នករាល់គ្នាអាចតាមដានជើងហោះហើររបស់អ្នកនៅទីនេះ នៅលើកម្មវិធីរបស់ពួកយើង ពួកយើងសូមអភ័យទោសសម្រាប់ភាពរអាក់រអួលមួយនេះ ។

លោក Kurt Verwilligen គឹជាអ្នកនំាពាក្យសេវាកម្មគ្រប់គ្រងចរាចរណ៍ផ្លូវអាកាសបែលហ្ស៊ិក និយាយថា ភ្លាមៗមុនវេលាម៉ោង ១៩ ម៉ោងសកល យានដ្រូនមួយគ្រឿង ត្រូវបានគេប្រទះឃើញនៅជិតអាកាសយានដ្ឋានក្រុងព្រុចសែល ហេតុដូច្នេះហើយ អាកាសយានដ្ឋានត្រូវបានបិទជាការប្រការសន្តិសុខ ទុកជាមុន ។

ខណៈពេលនោះដែរ អាកាសយានដ្ឋានក្រុង Liege និយាយផងដែរថា បច្ចុប្បន្ន ពួកគេបានបិទការហោះហើរ ក្រោយយានដ្រូនជាច្រើនគ្រឿង ត្រូវបានគេប្រទះឃើញ ។

គួរឲ្យដឹងថា កាលពីខែកញ្ញាកន្លងទៅ អាកាសយានដ្ឋានក្រុង Copenhagen និងអាកាសយានដ្ឋានក្រុង Oslo បានបិទការហោះហើរមួយរយៈពេលខ្លី ក្រោយប្រទះឃើញយានដ្រូន ខណៈយានដ្រូនត្រូវបានគេប្រទះឃើញនៅមូលដ្ឋានទ័ពអាកាសបែលហ្ស៊ិក កាលពីចុងសប្តាហ៍មុន ៕