ការិយាល័យនាយករដ្ឋមន្រ្តីអ៊ីស្រាអែល និយាយថា កាលពីថ្ងៃអង្គារម្សិលមិញ អ៊ីស្រាអែលទទួលបានសាកសពមនុស្សម្នាក់ពីក្រុមហាម៉ាស តាមរយៈកាកបាទក្រហមនៅតំបន់ហ្កាហ្សា ដែលនឹងត្រូវដឹកទៅកាន់អ៊ីស្រាអែល សម្រាប់កំណត់អត្តសញ្ញាណ ក្រោយក្រុមហាម៉ាស និយាយថា ពួកគេរកឃើញសាកសពចំណាប់ថ្នូរដែលត្រូវប្រគល់ជូនអ៊ីស្រាអែល ។

ក្រុមហាម៉ាស និយាយថា ពួកគេបានរកឃើញសាកសពចំណាប់ថ្នូរម្នាក់ដែលរក្សាទុកដោយក្រុមជីវពលប៉ាឡេស្ទីននៅតំបន់ Shejaia ដែលជាតំបន់ជាយក្រុងភាគខាងកើតទីក្រុងហ្កាហ្សា និងជាតំបន់នៅកាន់កាប់ដោយកងកម្លាំងអ៊ីស្រាអែល ក្រោយពីអ៊ីស្រាអែលអនុញ្ញាតឲ្យចូលទីតាំងនោះ សម្រាប់ក្រុមមកពីក្រុមហាម៉ាស និងកាកបាទក្រហមនៃគណៈកម្មាធិការអន្តរជាតិ ។

ក្រោមកិច្ចព្រមព្រៀងបច្ចុប្បន្នដែលបានចូលជាធរមានកាលពីថ្ងៃទី ១០ ខែតុលា ក្រុមហាម៉ាស បានប្រគល់ចំណាប់ថ្នូររស់ទាំងអស់ ២០នាក់ ដែលរក្សាទុកនៅតំបន់ហ្កាហ្សា ជាការដោះដូរនឹងអ្នកទោស និងអ្នកឃុំខ្លួនប៉ាឡេស្ទីនជិត ២ពាន់នាក់ នៅអ៊ីស្រាអែល ។ 

ក្រុមហាម៉ាស សន្យាប្រគល់សាកសពចំណាប់ថ្នូរស្លាប់ ប៉ុន្តែពួកគេនិយាយថា សង្រ្គាមខ្ទេចខ្ទាំនៅតំបន់ហ្កាហ្សា បានធ្វើឲ្យពួកគេពិបាកស្វែងរកសាកសព ។ អ៊ីស្រាអែល បានចោទប្រកាន់ក្រុមហាម៉ាសថា បង្អាក់ការប្រគល់សាកសពចំណាប់ថ្នូរ ។

ក្រុមអាជ្ញាធរសុខភាពហ្កាហ្សា និយាយថា មុនថ្ងៃអង្គារនោះ ក្រុមហាម៉ាស បានប្រគល់សាកសពមនុស្ស ២០នាក់ ក្នុងចំណោមសាកសពចំណាប់ថ្នូរ ២៨នាក់ ដែលបានបញ្ចុះនៅតំបន់ហ្កាហ្សា ។ ជាការដោះដូរវិញ អ៊ីស្រាអែល បានប្រគល់សាកសពជនប៉ាឡេស្ទីន ២៧០នាក់ ដែលពួកគេបានសម្លាប់ ចាប់តាំងពីសង្រ្គាមចាប់ផ្តើមកាលពីខែតុលា ឆ្នាំ ២០២៣ ។

ក្រុមអាជ្ញាធរសុខភាពប៉ាឡេស្ទីន និយាយថា កងកម្លាំងអ៊ីស្រាអែល បានសម្លាប់មនុស្ស ២៣៩នាក់ នៅក្នុងការវាយប្រហាររបស់ពួកគេ ចាប់តាំងពីបទឈប់បាញ់ចូលជាធរមាន ក្នុងនោះជិតពាក់កណ្តាលនៃពួកគេ ត្រូវបានសម្លាប់ក្នុងពេល ១ថ្ងៃ កាលពីសប្តាហ៍មុន ពេលដែលអ៊ីស្រាអែល សងសឹកសម្រាប់ការវាយប្រហាររបស់ក្រុមជីវពលលើទាហានរបស់ពួកគេ ៕