ក្រុមមន្រ្តីនិយាយថា មនសុ្សយ៉ាងហោច ៤នាក់ស្លាប់ និងជាច្រើននាក់ផ្សេងទៀត រងរបួស ក្រោយរថភ្លើងដឹកអ្នកដំណើរមួយខ្សែ បុកជាមួយរថភ្លើងដឹកទំនិញមួយខ្សែទៀត កាលពីថ្ងៃអង្គារ នៅស្រុក Bilaspur ស្ថិតនៅរដ្ឋភាគកណ្តាល Chhattisgarh ប្រទេសឥណ្ឌា ។

ទូរថភ្លើងដឹកអ្នកដំណើរដែលរងការខូចខាត ត្រូវបានគេមើលឃើញនៅពីលើទូក្រោយគេបំផុតរបស់រថភ្លើងដឹកទំនិញ ខណៈដែលក្រុមជួយសង្រ្គោះ កំពុងស្វែងរកអ្នករស់រាន ។

លោក Sanjay Agrawal គឺជាមន្រ្តីក្នុងស្រុក Bilaspur និយាយថា ទូដំបូងរបស់រថភ្លើងដឹកអ្នកដំណើរ និងទូក្រោយគេរបស់រថភ្លើងដឹកទំនិញ បានប៉ះគ្នា នៅក្នុងឧបទ្ទេវហេតុនេះ ហើយមកទល់នឹងពេលនេះ លោកអាចបញ្ជាកក់បានថា មនុស្ស ៤នាក់ បានស្លាប់ ហើយប្រតិបត្តិការជួយសង្រ្គោះ កំពុងបន្ត ។

យោងតាមសេចក្តីរាយការណ៍របស់សារព័ត៌មានក្នុងស្រុក បានឲ្យដឹងថា ឧបទ្ទេវហេតុរថភ្លើងបុកគ្នានេះ បានកើតឡើងនៅស្រុក Bilaspur ហើយក្រុមអាជ្ញាធរផ្លូវរថភ្លើង បានផ្អាកសេវាកម្មរថភ្លើងដឹកអ្នកដំណើរ និងរថភ្លើងដឹកទំនិញជាច្រើនខ្សែ ៕