យោងតាមការអះអាងរបស់ឧត្តមនាវីឯក Naveed Ashraf គឺជានាយអគ្គសេនាធិការកងទ័ពជើងទឹកប៉ាគីស្ថាន បានឲ្យដឹងថា កម្មវិធីនាវាមុជទឹកលំដាប់ថ្នាក់ Hangor ដ៏មហិច្ឆិតារបស់ប៉ាគីស្ថានដែលជាចំណុចកណ្តាលនៃភាពជាដៃគូកងទ័ពជើងទឹកចិន-ប៉ាគីស្ថាន ស្ថិតនៅលើផ្លូវនៃការដាក់ឲ្យប្រើប្រាស់នៅឆ្នាំ ២០២៦ខាងមុខ ។

 យោងតាមសេចក្តីរាយការណ៍ពីកាសែត Global Timesបានឲ្យដឹងថា លោក Ashraf និយាយថា គម្រោងកំពុងមានវឌ្ឍនភាពទៅយ៉ាងរលូន ដោយលោកកត់សំគាល់ឃើញថា ការដាក់ឲ្យប្រើប្រាស់កាលពីពេលថ្មីៗនូវនាវាមុជទឹកទី ២ និងទី ៣នៅក្នុងប្រទេសចិន បានក្លាយជាព្រឹត្តការណ៍ដ៏សំខាន់មួយសម្រាប់កិច្ចសហប្រតិបត្តិការកងទ័ពជើងទឹករវាងចិន និងប៉ាគីស្ថាន ។

 ទីក្រុងអ៊ីស្លាម៉ាបាដ បានចុះហត្ថលេខាដំបូងកិច្ចសន្យាជាមួយទីក្រុងប៉េកាំង កាលពីឆ្នាំ ២០១៥ ដើម្បីទទួលបាននាវាមុជទឹកធម្មតាលំដាប់ថ្នាក់ Hangor ចំនួន ៨គ្រឿង ។ ៤គ្រឿងក្នុងចំណោមនាវាមុជទឹកទាំងនេះ ផលិតនៅប្រទេសចិន ហើយនាវាមុជទឹកសេសសល់ ៤គ្រឿងទៀត នឹងត្រូវដំឡើងនៅក្នុងប្រទេសប៉ាគីស្ថាន ។

 ក្រោមកាលបរិច្ឆេតកំណត់បច្ចុប្បន្ន នាវាមុជទឹកទាំង ៨គ្រឿង នឹងត្រូវចែកចាយចន្លោះឆ្នាំ ២០២២ និងឆ្នាំ ២០២៨ ។ 

 នាវាមុជទឹកដំបូង ត្រូវបានដាក់ឲ្យប្រើប្រាស់កាលពីខែមេសា ឆ្នាំ ២០២៤ ហើយនាវាមុជទឹក ២គ្រឿងបន្ថែមទៀត ដាក់ឲ្យប្រើប្រាស់ក្នុងឆ្នាំនេះ ៕