នាព្រឹកថ្ងៃទី៥ ខែវិច្ឆិកា ឆ្នាំ២០២៥ តំណាងរាស្រ្តមណ្ឌលខេត្តបន្ទាយមានជ័យ រួមមាន ឯកឧត្តម ខេង ស៊ុម សមាជិកគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣) នៃរដ្ឋសភា និងលោកជំទាវ នួម សោភ័ណ សមាជិកាគណៈកម្មការសិទ្ធិមនុស្ស ទទួលពាក្យបណ្តឹងនិងអង្កេត និងអធិការកិច្ច (គណៈកម្មការទី១) នៃរដ្ឋសភា បានអញ្ជើញចុះសួរសុខទុក្ខ និងនាំយក គ្រឿង ឧបភោគ បរិភោគ និង បរិក្ខារ ប្រើប្រាស់ មួយចំនួនជូនដល់កងកម្លាំងជួរមុខក្នុងទីបញ្ជាការវរៈសេនាតូចនគរបាលការពារព្រំដែនគោកលេខ៨០៧ ស្ថិតឃុំគោករមៀត ស្រុកថ្មពួក ខេត្តបន្ទាយមានជ័យ។ 

ឯកឧត្តម ខេង ស៊ុម និងគណៈប្រតិភូ បានអញ្ជើញចុះសួរសុខទុក្ខនៅតាមអង្គភាពកងកម្លាំងកំពុងឈរជើងនៅតាមបន្ទាត់ព្រំដែន រួមមាន៖ បញ្ជាការដ្ឋានវរៈសេនាតូចនគរបាលការពារព្រំដែនគោកលេខ៨០៧ កម្លាំងនគរបាលបេតិកភ័ណ និងកងកម្លាំងតំបន់ប្រតិបត្តិការសឹករងខេត្តបន្ទាយមានជ័យ។ 

ក្នុងឱកាសចុះសួរសុខទុក្ខនេះ ឯកឧត្តមបានមានប្រសាសន៍កោតសរសើរ និងលើកទឹកចិត្តដល់កងកម្លាំងគ្រប់ប្រភេទដែលបានបំពេញភារកិច្ចរបស់ខ្លួន ក្នុងការការពារបូរណភាពទឹកដី និងរក្សាសុវត្ថិភាព សន្តិសុខជូនប្រជាពលរដ្ឋបានយ៉ាងល្អប្រសើរ។ 

ជាមួយគ្នានោះដែរ ឯកឧត្តមតំណាងរាស្រ្ត ក៏បានក្រើនរំលឹកដល់កងកម្លាំងគ្រប់ប្រភេទទាំងអស់បន្តបំពេញភារកិច្ចរបស់ខ្លួនឲ្យបានខ្ជាប់ខ្ជួន ជាពិសេសត្រូវគោរព និងអនុវត្តយ៉ាងម៉ឺងម៉ាត់ តាមបទបញ្ជា និងការណែនាំរបស់ថ្នាក់ដឹកនាំតាមអង្គភាព។ 

ឯកឧត្តមបានបញ្ជាក់ថា ដោយស្ថិតក្នុងស្ថានភាពដែលប្រទេសជាតិកំពុងមានបញ្ហាព្រំដែនជាមួយប្រទេសជិតខាង សូមឲ្យមេបញ្ជាការ ក៏ដូចជាកងកម្លាំងថ្នាក់ក្រោមគ្រប់ប្រភេទទាំងអស់ ត្រូវតែគោរពយ៉ាងម៉ឺងម៉ាត់ តាមបទបញ្ជា និងការសម្រេចនានារបស់រាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ 

ឯកឧត្តមខេង ស៊ុម និងគណៈប្រតិភូ ក៏បាននាំយកនូវគ្រឿងឧបភោគបរិភោគ និងសម្ភាររួមមាន៖ មី ៥០កេស ទឹកត្រី ៥០យួរ ទឹកស៊ីអ៊ីវ ៥០យួរ ទឹកសុទ្ធកម្ពុជា ៥០កេសទឹកសុទ្ធ ៨០០យួរ និងអង្ករ ៥០០គីឡូក្រាម៕