តួលេខផ្លូវការ បានបង្ហាញនៅថ្ងៃព្រហស្បតិ៍ (ទី៦ ខែវិច្ឆិកា) នេះថា ព្យុះទីហ្វុង Kalmaegi បានបណ្ដាលឲ្យមនុស្សយ៉ាងហោចណាស់ ១៤០នាក់ស្លាប់ និង ១២៧នាក់យ៉ាងតិចបាត់ខ្លួន បន្ទាប់ពីបានបង្កជាទឹកជំនន់ដ៏បំផ្លិចបំផ្លាញ នៅទូទាំងភាគកណ្តាលប្រទេសហ្វីលីពីន ខណៈដែលព្យុះនេះកំពុងបោកបក់ឆ្ពោះទៅវៀតណាម។

ការិយាល័យការពារជនស៊ីវិលជាតិ បានបញ្ជាក់ពីរបាយការណ៍នៃអ្នកស្លាប់ចំនួន ១១៤នាក់ តែចំនួននេះមិនរាប់បញ្ចូល ២៨នាក់បន្ថែម ដែលត្រូវបានកត់ត្រាដោយអាជ្ញាធរខេត្ត Cebu ឡើយ។

អនុប្រធានការិយាល័យការពារជនស៊ីវិល (លោក Bernardo Rafaelito Alejandro IV) បាននិយាយថា ការស្លាប់ភាគច្រើន ត្រូវបានរាយការណ៍នៅខេត្ត Cebu ភាគកណ្តាល ជាទីដែលត្រូវបានវាយប្រហារដោយព្យុះ Kalmaegi កាលពីថ្ងៃអង្គារ ដោយបង្កឲ្យមានទឹកជំនន់យ៉ាងគំហុកភ្លាមៗ ហើយបណ្តាលឲ្យកម្រិតទឹកទន្លេ និងផ្លូវទឹកផ្សេងទៀតឡើងហូរហៀរ។

មន្ត្រីបាននិយាយថា ទឹកជំនន់បានលេបត្របាក់សហគមន៍លំនៅឋាន ដោយធ្វើឲ្យអ្នកស្រុកឡើងទៅនៅលើដំបូលផ្ទះ ជាទីដែលពួកគេស្រែកអង្វរសុំឲ្យជួយសង្រ្គោះ ខណៈដែលទឹកជន់ឡើងខ្លាំងទៅៗ។

គួបញ្ជាក់ថា បើយោងតាមស្ថាប័នព្យាករ បានឲ្យដឹងថា ព្យុះ Kalmaegi បានបោកបក់ចេញពីខេត្ត Palawan ភាគខាងលិច ចូលទៅក្នុងសមុទ្រចិនខាងត្បូង នៅមុនថ្ងៃត្រង់ថ្ងៃពុធ ហើយកំពុងឆ្ពោះទៅប្រទេសវៀតណាម៕