រដ្ឋមន្ត្រីក្រសួងដឹកជញ្ជូនរបស់សហរដ្ឋអាមេរិក លោក Sean Duffy បាននិយាយកាលពីថ្ងៃពុធ ៥ វិច្ឆិកា ថា លោកនឹងបញ្ជាឱ្យកាត់បន្ថយជើងហោះហើរ ១០% នៅអាកាសយានដ្ឋានធំៗចំនួន ៤០ របស់សហរដ្ឋអាមេរិក ចាប់ពីថ្ងៃសុក្រ ៧ វិច្ឆិកា លុះត្រាតែកិច្ចព្រមព្រៀងបញ្ចប់ការបិទរដ្ឋាភិបាលសហព័ន្ធត្រូវបានសម្រេច។

ការបិទដែលឥឡូវនេះឈានដល់ថ្ងៃទី៣៦ និងយូរបំផុតក្នុងប្រវត្តិសាស្ត្រសហរដ្ឋអាមេរិក បានបង្ខំឱ្យក្រុមអ្នកត្រួតពិនិត្យចរាចរណ៍ផ្លូវអាកាសចំនួន១៣.០០០នាក់ និងភ្នាក់ងាររដ្ឋបាលសន្តិសុខដឹកជញ្ជូនចំនួន៥០.០០០នាក់ ធ្វើការដោយពុំទទួលបានប្រាក់ខែ។ នេះបានធ្វើឱ្យខ្វះបុគ្គលិកកាន់តែខ្លាំង បណ្តាលឱ្យមានការពន្យារពេលជើងហោះហើរយ៉ាងទូលំទូលាយ។

លោក Duffy បានប្រាប់ក្រុមអ្នកយកព័ត៌មានដោយពន្យល់ពីមូលហេតុដែលរូបលោកសម្រេចចិត្តបែបនេះ ថាពួកលោកបានពិនិត្យយ៉ាងយកចិត្តទុកលើការងាររបស់ខ្លួន ។

ខណៈរដ្ឋាភិបាលពុំបានបញ្ចេញឈ្មោះអាកាសយានដ្ឋានទាំង៤០ ដែលរងផលប៉ះពាល់នោះ ការកាត់បន្ថយនេះត្រូវគេរំពឹងថានឹងប៉ះពាល់ដល់អាកាសយានដ្ឋានដែលមមាញឹកបំផុតចំនួន ៣០ រួមទាំងនៅទីក្រុង New York, Washington, D.C., Chicago, Atlanta, Los Angeles និង Dallas ។ នេះនឹងកាត់បន្ថយជើងហោះហើរចំនួន១.៨០០ និងកៅអីក្រុមហ៊ុនអាកាសចរណ៍ជាង២៦៨.០០០ កន្លែង នេះបើយោងតាមក្រុមហ៊ុនវិភាគអាកាសចរណ៍ Cirium ៕