សហរដ្ឋអាមេរិក កាលពីថ្ងៃពុធ (ទី៥ ខែវិច្ឆិកា) បានបើកកិច្ចប្រជុំជាមួយសមាជិកនៃក្រុមប្រឹក្សាសន្តិសុខអង្គការសហប្រជាជាតិ (UNSC) ដោយដាក់សេចក្តីព្រាងសេចក្ដីសម្រេច ទាក់ទងនឹងកងកម្លាំងធានាស្ថិរភាពអន្តរជាតិ នៅតំបន់ហ្កាហ្សា (ISF) ក្រោយសង្គ្រាម។

បេសកកម្មអាមេរិក ប្រចាំនៅអង្គការសហប្រជាជាតិ (UN) បានលើកឡើងថា៖ «ក្រោមការដឹកនាំដ៏អង់អាចរបស់លោកប្រធានាធិបតី (Donald) Trump សហរដ្ឋអាមេរិកនឹងធ្វើឲ្យមានលទ្ធផលជាក់ស្ដែង នៅ UN ដែលមិនគ្រាន់តែជាការពិភាក្សាគ្មានទីបញ្ចប់នោះឡើយ។ ភាគីនានាបានចាប់យកឱកាសជាប្រវត្តិសាស្ត្រនេះ ដើម្បីបញ្ចប់ការបង្ហូរឈាមជាច្រើនទសវត្សរ៍ ហើយធ្វើឲ្យចក្ខុវិស័យរបស់ប្រធានាធិបតី អំពីការមានសន្តិភាពយូរអង្វែង នៅមជ្ឈិមបូព៌ា ក្លាយជាការពិត»។

តែឥស្សរជនជាន់ខ្ពស់នៃក្រុមប្រឹក្សាសន្តិសុខជាតិ (NSC) របស់អ៊ីស្រាអែល បានឲ្យដឹងនៅថ្ងៃពុធនោះថា អ៊ីស្រាអែលមិនបានទទួលសេចក្តីព្រាងសេចក្ដីសម្រេចនេះពីមុនមកទេ។ ហើយគណៈរដ្ឋមន្ត្រីសន្តិសុខរបស់អ៊ីស្រាអែលមិនទាន់ពិភាក្សា អំពីសេចក្តីព្រាងនេះនៅឡើយទេ។ ប្រភពពីគណៈរដ្ឋមន្ត្រី បាននិយាយថា៖ «យើងមិនបានទទួលឯកសារនោះទេ។ វាមិនត្រឹមត្រូវទាល់តែសោះ។ អ្នកសារព័ត៌មានមានព័ត៌មានបន្ថែម តែយើងអត់មាន។ វាមិនសមហេតុផលឡើយ»។

គួរបញ្ជាក់ថា សេចក្តីព្រាងដែលត្រូវបានដាក់ជូនដោយសហរដ្ឋអាមេរិកទៅកាន់ UNSC នឹងរួមបញ្ចូលការផ្តួចផ្តើមបង្កើតកងកម្លាំងអន្តរជាតិដែលនឹងធ្វើប្រតិបត្តិការ នៅតំបន់ហ្កាហ្សាស្ទ្រីប យ៉ាងហោចណាស់រយៈពេល ២ឆ្នាំ ហើយភារកិច្ចរបស់ពួកគេ គឺដើម្បីធ្វើឲ្យដែនដីនេះមិនមានកងទ័ព រួមជាមួយនឹងការបង្កើតកងកម្លាំងនគរបាលប៉ាឡេស្ទីនថ្មី។ ហើយកងកម្លាំងបណ្តោះអាសន្ននេះ ដែលនឹងប្រតិបត្តិការក្រោមការបញ្ជាបង្រួបបង្រួម និងសម្របសម្រួលយ៉ាងជិតស្និទ្ធជាមួយអ៊ីស្រាអែល និងអេហ្ស៊ីប ក៏នឹងមានភារកិច្ចបណ្តុះបណ្តាលមន្ត្រីសន្តិសុខប៉ាឡេស្ទីនថ្មីផងដែរ។

សេចក្តីព្រាងនេះ ក៏បង្កើតគណៈកម្មាធិការជំនាញប៉ាឡេស្ទីនដែលមិនប្រកាន់និន្នាការនយោបាយ ដើម្បីគ្រប់គ្រងសេវាស៊ីវិល នៅក្នុងដែនដីនេះ រហូតដល់ស្ថានភាពមានស្ថិរភាព។ ម្យ៉ាងទៀត រដ្ឋាភិបាលមូលដ្ឋានដោយគ្មានអាណត្តិបក្ស នឹងជំនួសក្រុមហាម៉ាស ក្នុងនាមជាកងកម្លាំងគ្រប់គ្រង នៅតំបន់នេះ៕