បាល់ទាត់៖ ការប្រកួតកីឡាពានរង្វាន់សម្ដេចអគ្គមហាសេនាបតីតេជោ ហ៊ុន សែន ពានថ្នាក់ខេត្ត ២០២១ នៅសប្ដាហ៍នេះមានតែពីរប្រកួតប៉ុណ្ណោះ បន្ទាប់ពីការប្រកួត ៧ទៀតត្រូវលើកពេល។ សម្រាប់ការប្រកួតថ្ងៃអង្គារនេះ មានតែការប្រកួតរវាងខេត្តកំពង់ធំ និងខេត្តសៀមរាប ចំនែកថ្ងៃពុធមានតែការប្រកួតរវាងខេត្តប៉ៃលិន និងខេត្តបាត់ដំបង។
ចំនែកការប្រកួតសប្ដាហ៍ទី៥ ដែលលើកពេលមាន៖ កំពង់ស្ពឺប្រកួតជាមួយកំពង់ឆ្នាំង, បន្ទាយមានជ័យជាមួយពោធិ៍សាត់, ត្បូងឃ្មុំប្រកួតជាមួយខេត្តព្រះវិហារ, កោះកុងប្រកួតជាមួយខេត្តព្រះសីហនុ, តាកែវប្រកួតជាមួយភ្នំពេញ, កណ្តាលប្រកួតជាមួយកំពង់ចាម និងខេត្តកំពតប្រកួតជាមួយខេត្តកែប។ ក្រោយលេងបាន ៤ប្រកួតក្នុងពូល A ហ្គាឡាក់ស៊ីភ្នំពេញឈរលេខ១មាន ៨ពិន្ទុ, កំពង់ស្ពឺ និងកំពង់ឆ្នាំងមាន ៧ពិន្ទុដូចគ្នា តាកែវធ្លាក់ពីការប្រកួត។ ពូល B ៤ប្រកួត ខេត្តបន្ទាយមានជ័យឡើងទៅវគ្គ ១៦ក្រុមចុងក្រោយហើយមាន ១០ពិន្ទុ, សូហ្វីយ៉ាប៉ៃលិនមាន ៧ពិន្ទុ, បាត់ដំបងលេខ៣ មាន ៦ពិន្ទុ ឯខេត្តពោធិ៍សាត់មាន ០ពិន្ទុ។ ពូល C ខេត្តឧត្តរមានជ័យលេខ១ មាន ៦ពិន្ទុ ចំនែកកំពង់ធំលេខ២ មាន ៣ពិន្ទុក្រោយលេងបាន ៣ប្រកួត ចំនែកសៀមរាបលេខ៣ មាន ៣ពិន្ទុ តែទើបលេងបាន ២ប្រកួតទេ។
ពូល D កំពង់ចាមលេខ១ ២ប្រកួតមាន ៤ពិន្ទុ, ស្វាយរៀងលេខ២ ១ប្រកួតមាន ១ពិន្ទុ ចំនែកខេត្តកណ្ដាលមិនទាន់មានពិន្ទុនៅឡើយ តែនៅសល់ ៣ប្រកួតក្នុងដៃទៀត។ ពូល E ខេត្តកោះកុងលេខ១ ៣ប្រកួតមាន ៧ពិន្ទុ, លេខ២ ខេត្តកែប ២ប្រកួតមាន ៤ពិន្ទុ, ខេត្តព្រះសីហនុលេខ៣ ២ប្រកួតមាន ៣ពិន្ទុ ឯខេត្តកំពត ៣ប្រកួតចាញ់ទាំង៣។ ដោយឡែកពូល F ខេត្តត្បូងឃ្មុំកក់កៅអីវគ្គបន្ទាប់ហើយ ក្រោយ ៣ប្រកួតឈ្នះទាំង៣ មាន ៩ពិន្ទុ, ខេត្តរតនគីរីលេខ២ ៣ប្រកួតមាន ៣ពិន្ទុ រីឯខេត្តព្រះវិហារ ២ប្រកួតចាញ់ទាំង២៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
