ប្រធានាធិបតីអាមេរិកលោក Donald Trump បានចោទប្រកាន់ក្រុមអ្នកប្រជាធិបតេយ្យថា ជា «ក្រុមបំផ្លាញសូម្បីតែខ្លួនឯង» ដោយបានបញ្ជាក់ថា ពួកគេកំពុងរៀបចំបំផ្លាញប្រទេស ខណៈដែលការបិទរដ្ឋាភិបាលបានស្ថិតក្នុងរយៈពេលយូរបំផុត ក្នុងប្រវត្តិសាស្ត្រ កាលពីថ្ងៃពុធ (ទី៥ ខែវិច្ឆិកា) ពោលគឺបានបំបែកកំណត់ត្រារយៈពេល ៣៥ថ្ងៃ ដែលបានកើតឡើងក្នុងអំឡុងពេលអាណត្តិដំបូងរបស់មេដឹកនាំទៅពីគណបក្សសាធារណរដ្ឋរូបនេះ។

ទីភ្នាក់ងារសហព័ន្ធ បាននិងកំពុងផ្អាកដំណើរការ ចាប់តាំងពីសភាបានបរាជ័យក្នុងការអនុម័តការផ្តល់មូលនិធិ កាលពីថ្ងៃទី៣០ ខែកញ្ញា ហើយកម្មវិធីសុខុមាលភាពបាននិងកំពុងស្ថិតក្នុងហានិភ័យ ក្នុងនោះរួមទាំងជំនួយដែលជួយប្រជាជនអាមេរិករាប់លាននាក់ឲ្យមានលទ្ធភាពទិញគ្រឿងទេសផងដែរ។

បុគ្គលិកសហព័ន្ធប្រហែល ១,៤លាននាក់ រាប់ចាប់ពីអ្នកត្រួតពិនិត្យចរាចរណ៍ផ្លូវអាកាស រហូតដល់អ្នកយាមកន្លែងចតរថយន្ត នៅតែបន្តឈប់សម្រាកដោយបង្ខំ ឬកំពុងធ្វើការដោយគ្មានប្រាក់ឈ្នួល។ ស្ថាប័នតុលាការមួយចំនួន កំពុងប្រើប្រាស់មូលនិធិសង្គ្រោះបន្ទាន់ ដើម្បីបន្តដំណើរការ ដោយព្រមានថា ប្រតិបត្តិការអាចមានភាពយឺតយ៉ាវ ប្រសិនបើការបិទរដ្ឋាភិបាលបន្តអូសបន្លាយ។

អំឡុងកិច្ចប្រជុំអាហារពេលព្រឹកជាមួយសមាជិកព្រឹទ្ធសភាមកពីគណបក្សសាធារណរដ្ឋ នៅឯសេតវិមាន ខណៈពេលដែលការបិទរដ្ឋាភិបាលបានឈានចូលដល់សប្តាហ៍ទី៦ លោកប្រធានាធិបតីវ័យ ៧៩ឆ្នាំ បានប្រាប់ថា៖ «ខ្ញុំទើបតែបានត្រលប់មកពីប្រទេសជប៉ុនវិញ»។ ដោយបាននិយាយសំដៅទៅលើសមាជិកគណបក្សប្រជាធិបតេយ្យ លោកបានបន្ថែមថា៖ «ខ្ញុំបាននិយាយអំពីអ្នកបើកយន្តហោះអត្តឃាត។ ខ្ញុំគិតថា មនុស្សទាំងនេះ គឺដូចទៅអ្នកបើកយន្តហោះអត្តឃាតនោះ។ ពួកគេនឹងសុខចិត្តធ្វើឲ្យប្រទេសដួលរលំ ប្រសិនបើពួកគេសម្រេចគោលដៅរបស់ខ្លួន»។

សមាជិកគណបក្សប្រជាធិបតេយ្យ បានបញ្ជាក់ថា ពួកគេនឹងបោះឆ្នោតគាំទ្រ ដើម្បីបញ្ចប់ការខ្វះខាតថវិកា លុះត្រាតែកិច្ចព្រមព្រៀងមួយ ត្រូវបានឈានដល់ ដើម្បីបន្តការឧបត្ថម្ភធនធានារ៉ាប់រងដែលផុតកំណត់ ដើម្បីឲ្យមានការថែទាំសុខភាពតម្លៃសមរម្យ សម្រាប់ប្រជាជនអាមេរិករាប់លាននាក់៕