ស៊ូដង់៖ បាតុកររាប់ពាន់នាក់បានធ្វើបាតុកម្មនៅក្នុងរដ្ឋធានីរបស់ប្រទេសស៊ូដង់ ក្នុងការធ្វើបាតុកម្មថ្មីប្រឆាំងទៅនឹងរដ្ឋប្រហារយោធាកាលពីឆ្នាំមុន។ ក្រុមបាតុករដែលភាគច្រើនជាបុរស និងស្ត្រីវ័យក្មេងបានដើរធ្វើបាតុកម្មតាមដងផ្លូវក្នុងទីក្រុង Khartoum និងទីក្រុងដទៃទៀតដោយទាមទារឱ្យបញ្ចប់ការគ្រប់គ្រងរបស់យោធា។
ក្រុមបាតុករបានអំពាវនាវឲ្យមានរដ្ឋាភិបាលស៊ីវិលពេញលេញ ដើម្បីដឹកនាំការផ្លាស់ប្តូរប្រទេសដែលជាប់គាំងនៅពេលនេះទៅរកលទ្ធិប្រជាធិបតេយ្យ។ វីដេអូដែលបានផ្សព្វផ្សាយតាមអ៊ីនធឺណិតបានបង្ហាញពីក្រុមអ្នកតវ៉ាវាយស្គរ និងស្រែកពាក្យប្រឆាំងរដ្ឋប្រហារនៅតាមដងផ្លូវក្នុងទីក្រុង Khartoum និងទីក្រុង Omdurman។ ក្រុមបាតុករត្រូវបានគេមើលឃើញកាន់ទង់ជាតិប្រទេសស៊ូដង់ និងបដាដែលបង្ហាញពីរូបភាពមនុស្សស្លាប់នៅក្នុងការប៉ះទង្គិចគ្នា ជាមួយកងកម្លាំងសន្តិសុខអំឡុងពេលបាតុកម្មមុនៗ។ កងកម្លាំងសន្តិសុខបានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រដើម្បីបំបែកក្រុមអ្នកតវ៉ានៅទីតាំងក្នុងរដ្ឋធានី៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
