នាយករដ្ឋមន្ត្រីជប៉ុន លោកស្រី Sanae Takaichi នៅថ្ងៃព្រហស្បតិ៍ (ទី៦ ខែវិច្ឆិកា) នេះ បាននិយាយថា ប្រទេសជប៉ុន និងសហរដ្ឋអាមេរិក នឹងសិក្សារួមគ្នា ស្ដីពីការអភិវឌ្ឍការជីករ៉ែកម្រ នៅក្នុងដែនទឹក ជុំវិញកោះ Minamitori ក្នុងមហាសមុទ្រប៉ាស៊ីហ្វិក។

លោកស្រី Takaichi បានប្រាប់សម័យប្រជុំសភាថា ការអភិវឌ្ឍរួមគ្នាលើរ៉ែកម្រនេះ គឺជាប្រធានបទដ៏សំខាន់ នៅក្នុងជំនួបកំពូលរបស់លោកស្រីជាមួយប្រធានាធិបតីអាមេរិក លោក Donald Trump កាលពីសប្តាហ៍មុន។

គួរបញ្ជាក់ថា ក្នុងអំឡុងពេលទស្សនកិច្ចរបស់លោក Trump នៅទីក្រុងតូក្យូ ប្រទេសទាំង២ បានចុះហត្ថលេខាលើកិច្ចព្រមព្រៀងក្របខ័ណ្ឌមួយ សម្រាប់ការធានាការផ្គត់ផ្គង់រ៉ែកម្រ ដើម្បីទប់ទល់នឹងការត្រួតត្រារបស់ប្រទេសចិន ចំពោះវត្ថុធាតុដើមនេះដែលប្រើប្រាស់លើការផលិតគ្រប់យ៉ាង រាប់ចាប់ពីរថយន្ត រហូតដល់យន្តហោះចម្បាំង។

លោកស្រី Takaichi បាននិយាយថា មានភក់ច្រើនសន្ធឹកសន្ធាប់ដែលអាចមានផ្ទុករ៉ែកម្រ នៅជុំវិញកោះ Minamitori ចម្ងាយប្រហែល ១.៩០០គីឡូម៉ែត្រ នៅភាគអាគ្នេយ៍នៃទីក្រុងតូក្យូ។ ហើយបើយោងតាមលោកស្រី Takaichi បានឲ្យដឹងថា ប្រទេសជប៉ុនគ្រោងនឹងសាកល្បងលទ្ធភាពនៃការជីកដីភក់រ៉ែកម្រពីជម្រៅ ៦.០០០ម៉ែត្រ ក្នុងខែមករា។

លោក Takaichi បានសង្កត់ធ្ងន់ថា៖ «យើងនឹងពិចារណាពីមធ្យោបាយជាក់លាក់ ក្នុងការលើកកម្ពស់កិច្ចសហប្រតិបត្តិការ រវាងប្រទេសជប៉ុន និងសហរដ្ឋអាមេរិក លើការអភិវឌ្ឍរ៉ែកម្រ នៅជុំវិញកោះ Minamitori»។

រដ្ឋាភិបាលជប៉ុនកំពុងជំរុញគម្រោងជាតិ ដើម្បីអភិវឌ្ឍផលិតកម្មរ៉ែកម្រ ក្នុងស្រុក ដែលជាផ្នែកមួយនៃកិច្ចប្រឹងប្រែងយ៉ាងទូលំទូលាយ ដើម្បីពង្រឹងសន្តិសុខដែនសមុទ្រ និងសេដ្ឋកិច្ច៕