អ្នកឡើងភ្នំជនជាតិអ៊ីតាលី ៧ នាក់កំពុងបាត់ខ្លួននៅលើភ្នំហិម៉ាឡៃ របស់ប្រទេសនេប៉ាល់ បន្ទាប់ពីព្យុះព្រិលដ៏ខ្លាំងក្លា និងការបាក់ធ្លាក់ផ្ទាំងទឹកកក បានសម្លាប់មនុស្សយ៉ាងហោចណាស់ ៩ នាក់ក្នុងរយៈពេលប៉ុន្មានថ្ងៃថ្មីៗនេះ។

អ្នកឡើងភ្នំជនជាតិអ៊ីតាលី ៣នាក់ ស្ថិតក្នុងចំណោមជនបរទេស ៥នាក់ និងមគ្គុទ្ទេសក៍នេប៉ាល់ ២នាក់ ដែលត្រូវបានបញ្ជាក់ថា បានស្លាប់កាលពីថ្ងៃចន្ទ នៅពេលផ្ទាំងទឹកកកដ៏ធំបានធ្លាក់សង្កត់លើជំរំមូលដ្ឋានមួយនៅជិតកំពូលភ្នំ Yalung Ri ក្នុងជួរភ្នំហិមាឡៃ របស់ប្រទេសនេប៉ាល់ នេះបើយោងតាមរបាយការណ៍។

ក្រសួងការបរទេសអ៊ីតាលី បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា ក្រុមអាជ្ញាធរក្នុងតំបន់បានបញ្ជាក់ពីការស្លាប់របស់អ្នកឡើងភ្នំអ៊ីតាលីទាំងបីនាក់ ប៉ុន្តែមិនមានព័ត៌មានអំពីជនជាតិអ៊ីតាលី ៧ នាក់ផ្សេងទៀតដែលត្រូវបានរាយការណ៍ថាបានបាត់ខ្លួននោះទេ។

ក្រសួងខាងលើបាននិយាយថា ក្នុងរយៈពេលប៉ុន្មានថ្ងៃថ្មីៗនេះ តំបន់ជាច្រើននៃភ្នំហិម៉ាឡៃ របស់ប្រទេសនេប៉ាល់ បានរងផលប៉ះពាល់ដោយការបាក់ផ្ទាំងទឹកកកជាបន្តបន្ទាប់ ដែលបានវាយប្រហារអ្នកឡើងភ្នំជាច្រើន រួមទាំងពលរដ្ឋអ៊ីតាលីផងដែរ៕