ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ ៥វិច្ឆិកា ថា សហរដ្ឋអាមេរិកនឹងបញ្ឈប់ជំនួយទាំងអស់ដល់ប្រទេសនីហ្សេរីយ៉ា ហើយអាចចូលទៅក្នុងប្រទេសនេះ ប្រសិនបើប្រទេសអាហ្រ្វិកមួយនេះ មិនបញ្ឈប់ការកាប់សម្លាប់គ្រិស្តសាសនិក។ 

កាលពីសប្តាហ៍មុន លោក Trump បានដាក់ប្រទេសនីហ្សេរីយ៉ាឡើងវិញនៅក្នុងបញ្ជីប្រទេសដែលសហរដ្ឋអាមេរិកនិយាយថាបានរំលោភលើសេរីភាពសាសនា ហើយកាលពីថ្ងៃសៅរ៍ ១ វិច្ឆិកា បាននិយាយថាលោកបានស្នើសុំឱ្យក្រសួងការពារជាតិរៀបចំសម្រាប់ចំណាត់ការខាងយោធាឲ្យបានឆាប់តាមដែលអាចធ្វើទៅបាន ប្រសិនបើនីហ្សេរីយ៉ា មិនបង្ក្រាបការកាប់សម្លាប់គ្រិស្តសាសនិកទេនោះ។ 

ការសម្រេចចិត្តរបស់ទីក្រុងវ៉ាស៊ីនតោនក្នុងការចាត់ទុកប្រទេសនីហ្សេរីយ៉ាជាអ្នករំលោភលើសេរីភាពសាសនា បានធ្វើឱ្យទំនាក់ទំនងការទូតរវាងប្រទេសទាំងពីរកាន់តែតានតឹង។ 

រដ្ឋាភិបាលរបស់ប្រទេសនីហ្សេរីយ៉ា បានច្រានចោលការចាត់ទុករបស់ខ្លួនដោយសហរដ្ឋអាមេរិកថាជា ប្រទេសដែលមានការព្រួយបារម្ភជាពិសេស ចំពោះការរំលោភលើសេរីភាពសាសនា ដែលត្រូវបានចោទប្រកាន់ដោយនិយាយថា ចំណាត់ការនេះគឺផ្អែកលើព័ត៌មានមិនពិត និងទិន្នន័យមិនត្រឹមត្រូវ៕