មន្ត្រីរដ្ឋបាលជាន់ខ្ពស់របស់លោកប្រធាធិបតី Donald Trump បានផ្តល់បច្ចុប្បន្នភាពដល់សមាជិកព្រឹទ្ធសភា និងសភាតំណាងរាស្ត្រ កាលពីថ្ងៃពុធ (ទី៥ ខែវិច្ឆិកា) អំពីការវាយប្រហារលើទូកសង្ស័យជួញដូរគ្រឿងញៀន នៅប្រទេសវ៉េណេស៊ុយអេឡា បន្ទាប់ពីមានការខកចិត្តនៅសភា ជុំវិញកង្វះតម្លាភាព អំពីប្រតិបត្តិការនេះ។

រដ្ឋមន្ត្រីការបរទេស លោក Marco Rubio និងរដ្ឋមន្ត្រីការពារជាតិ លោក Pete Hegseth បានជួបជាមួយមេដឹកនាំសភាមកពីគណបក្សសាធារណរដ្ឋ និងប្រជាធិបតេយ្យ ហើយនិងសមាជិកជាន់ខ្ពស់នៃគណៈកម្មាធិការសន្តិសុខជាតិរយៈពេលប្រហែល ១ម៉ោង ដោយពិភាក្សាអំពីការវាយប្រហាររបស់សហរដ្ឋអាមេរិក លើនាវានៅសមុទ្រការ៉ាអ៊ីព និងមហាសមុទ្រប៉ាស៊ីហ្វិក ជាចំណាត់ការដែលបានសម្លាប់មនុស្សរាប់សិបនាក់ គិតចាប់តាំងពីដើមខែកញ្ញាមក។

រដ្ឋបាលរបស់លោក Trump ទទូចថា គោលដៅទាំងនោះ កំពុងដឹកជញ្ជូនគ្រឿងញៀន តែមិនបានផ្តល់ភស្តុតាង ឬពន្យល់ជាសាធារណៈនូវហេតុផលផ្លូវច្បាប់ ដើម្បីជាអំណះអំណាង សម្រាប់ការសម្រេចវាយប្រហារលើទូក ជាជាងបញ្ឈប់ពួកគេ និងចាប់ខ្លួនអ្នកដែលជិះនៅលើទូក។

សមាជិកព្រឹទ្ធសភា និងសមាជិកសភាជាច្រើនរូប ដែលបានចូលរួមស្ដាប់ការផ្ដល់ព័ត៌មាននេះ បាននិយាយថា មន្ត្រីរដ្ឋបាល បានបញ្ជាក់ថា ទូកទាំងនោះបានផ្ទុកកូកាអ៊ីន មិនមែនសារធាតុហ្វង់តានីល ហើយបានពន្យល់ពីហេតុផលផ្លូវច្បាប់របស់ពួកគេ។

ការវាយប្រហារនេះបានធ្វើឲ្យមានភាពតានតឹង រវាងទីក្រុងវ៉ាស៊ីនតោន និងទីក្រុងការ៉ាកាស កាន់តែខ្លាំងឡើងៗ ខណៈដែលលោក Trump បានបញ្ជាឲ្យបង្កើនកងកម្លាំងយោធាដ៏ធំ នៅក្នុងតំបន់ ហើយបាននិយាយថា រដ្ឋបាលរបស់លោកនឹងធ្វើការវាយប្រហារប្រឆាំងនឹងគោលដៅពាក់ព័ន្ធនឹងគ្រឿងញៀន នៅក្នុងប្រទេសវ៉េណេស៊ុយអេឡា៕