សារព័ត៌មានក្នុងស្រុក Cong An Nhan Dan បានរាយការណ៍នៅថ្ងៃព្រហស្បតិ៍នេះថា អាកាសយានដ្ឋានចំនួនប្រាំបី និងជើងហោះហើរជាង ៥០ នៅក្នុងប្រទេសវៀតណាម ត្រូវបានរងផលប៉ះពាល់ ខណៈព្យុះទីហ្វុង Kalmaegi បោះពួយទៅកាន់តំបន់ភាគកណ្តាល និងភាគខាងត្បូងរបស់ប្រទេស នេះ ក្រោយវាយប្រហារប្រទេសហ្វីលីពីន។  

យោងតាមអាជ្ញាធរអាកាសចរណ៍ស៊ីវិលវៀតណាមបានឱ្យដឹងថា អាកាសយានដ្ឋានដែលរំពឹងថានឹងរងផលប៉ះពាល់ដោយផ្ទាល់រួមមាន Da Nang, Phu Bai, Lien Khuong, Chu Lai, Phu Cat, Tuy Hoa, Pleiku និង Buon Ma Thuot ។ 

អាជ្ញាធរបានបញ្ជាឲ្យមានការត្រួតពិនិត្យគ្រប់ពេលវេលា និងការអនុវត្តយ៉ាងតឹងរ៉ឹងចំពោះនីតិវិធីឆ្លើយតបនឹងព្យុះទីហ្វុងនេះ។ 

សាជីវកម្មអាកាសយានដ្ឋាននៃប្រទេសវៀតណាមត្រូវបានណែនាំឱ្យសម្របសម្រួលជាមួយស្ថាប័នពាក់ព័ន្ធដើម្បីត្រួតពិនិត្យហេដ្ឋារចនាសម្ព័ន្ធព្រលានយន្តហោះ និងប្រព័ន្ធទំនាក់ទំនង និងស្វែងរកនិងជួសជុលភ្លាមៗ។

ទីភ្នាក់ងារសារព័ត៌មានវៀតណាមបានរាយការណ៍ថា ក្រុមហ៊ុនអាកាសចរណ៍ជាតិវៀតណាមបានប្រកាសថាជើងហោះហើរជាង ៥០ ដែលគ្រោងធ្វើនៅថ្ងៃព្រហស្បតិ៍នេះ និងថ្ងៃសុក្រ ត្រូវបានរងផលប៉ះពាល់ដោយសារតែការកែតម្រូវជើងហោះហើរដែលបានធ្វើឡើងដើម្បីធានាសុវត្ថិភាពប្រតិបត្តិការ៕