ប្រទេសបារាំងបានស្នើឲ្យគណៈកម្មការអឺរ៉ុបស៊ើបអង្កេតក្រុមហ៊ុន Shein Group និងចាត់វិធានការបន្ថែមប្រឆាំងនឹងក្រុមហ៊ុនលក់តាមប្រព័ន្ធអេឡិចត្រូនិកលំដាប់យក្សរបស់ចិនមួយនេះ បន្ទាប់ពីរដ្ឋាភិបាលបារាំង បានដាក់ចេញនូវចំណាត់ការផ្អាកវេទិកានេះ ដោយសារមានការតវ៉ា អំពីការលក់តុក្កតាទាក់ទងនឹងផ្លូវភេទ និងអាវុធ។

ការអំពាវនាវរបស់រដ្ឋាភិបាលបារាំងឲ្យសហភាពអឺរ៉ុប (EU) ចូលពាក់ព័ន្ធក្នុងជម្លោះនេះ កើតឡើងបន្ទាប់ពីទីក្រុងប៉ារីសបានផ្តួចផ្តើមនូវលទ្ធភាពនៃការមាននីតិវិធីផ្អាកដំណើរការចំនួន ២ ប្រឆាំងនឹងក្រុមហ៊ុន Shein។ របាយការណ៍មួយទៅកាន់ការិយាល័យរបស់រដ្ឋអាជ្ញា បានរកឃើញពីការលក់កាំបិត និងស្នាប់ដៃ ចំពេលមានការខឹងសម្បា ចំពោះតុក្កតាទាក់ទងនឹងផ្លូវភេទដែលផ្តល់ជូននៅលើវេទិកាលក់របស់ក្រុមហ៊ុននេះ។

យោងតាមលិខិតផ្ញើជូនគណៈកម្មាការដែលផ្តល់ដោយក្រសួងហិរញ្ញវត្ថុបារាំង បានឲ្យដឹងថា អឺរ៉ុបអាចផ្ដល់ផលប៉ះពាល់យ៉ាងធ្ងន់ធ្ងរដល់វេទិកាលក់អនឡាញដ៏ធំនេះ ដោយមានការផាកពិន័យរហូតដល់ ៦ភាគរយនៃប្រាក់ចំណូលសកលរបស់ក្រុមហ៊ុន និងចាត់វិធានការ ដើម្បីផ្អាកសកម្មភាពរបស់ក្រុមហ៊ុន។

នៅក្នុងលិខិតមួយផ្ញើទៅកាន់អនុប្រធានរបស់គណៈកម្មាការ គឺលោកស្រី Henna Virkkunen រដ្ឋមន្ត្រីក្រសួងហិរញ្ញវត្ថុបារាំង លោក Roland Lescure និងរដ្ឋមន្ត្រីឌីជីថល លោកស្រី Anne le Henanff បានលើកឡើងថា៖ «ប្រទេសបារាំងអំពាវនាវឲ្យគណៈកម្មការអឺរ៉ុបអនុវត្តទាំងស្រុងនូវអំណាចទាំងនេះ ក្នុងនោះរួមទាំងតាមរយៈការចេញវិធានការបណ្តោះអាសន្នប្រឆាំងនឹងវេទិកានេះ និងសូមធ្វើការស៊ើបអង្កេតភ្លាមៗ ដើម្បីបំភ្លឺឲ្យបានពេញលេញ អំពីដំណើរការខុសប្រក្រតីដែលនាំឲ្យមានទីផ្សារផលិតផលខុសច្បាប់ នៅលើវេទិកានេះ»។

ក្រុមហ៊ុន Shein មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយពីសារព័ត៌មាន Bloomberg News៕