ព្យុះទីហ្វុង Kalmaegi បានវាយប្រហារប្រទេសវៀតណាមកាលពីថ្ងៃព្រហស្បតិ៍ ដោយបង្ខំឱ្យអាជ្ញាធរលុបចោលជើងហោះហើររាប់រយជើង និងបញ្ជាឱ្យប្រជាជនស្នាក់នៅក្នុងផ្ទះ ពីរថ្ងៃបន្ទាប់ពីព្យុះបានចាប់ផ្តើមបោកបក់ទូទាំងប្រទេសហ្វីលីពីន ដោយបានសម្លាប់មនុស្សយ៉ាងហោចណាស់ ១១៤ នាក់។

យោងតាមអ្នកព្យាករណ៍អាកាសធាតុជាតិ ព្យុះ Kalmaegi បានវាយប្រហារដោយកម្លាំងខ្យល់រហូតដល់ ១៤៩ គីឡូម៉ែត្រក្នុងមួយម៉ោង។ ទីភ្នាក់ងារនេះបានបន្ថែមថា ព្យុះទីហ្វុងនេះបានបក់របើកដំបូលផ្ទះ ផ្ដួលរំលំដើមឈើ និងបង្គោលភ្លើង និងបង្កើតរលកកម្ពស់រហូតដល់ ១០ ម៉ែត្រ ខណៈព្យុះនេះ បានវាយប្រហារឆ្នេរសមុទ្រភាគកណ្តាល។ 

ក្រុមមន្ត្រីបានបិទអាកាសយានដ្ឋានចំនួន៦ ហើយរដ្ឋាភិបាលបាននិយាយថា មនុស្សជាង ២៦០.០០០ នាក់នៅក្នុងខេត្ត Gia Lai ត្រូវបានជម្លៀសទៅកាន់កន្លែងសុវត្ថិភាព។

Kalmaegi គឺជាព្យុះទី ១៣ ដែលវាយប្រហារប្រទេសវៀតណាមនៅឆ្នាំនេះ និងជាព្យុះដ៏មានឥទ្ធិពលបំផុត។

រដ្ឋាភិបាលបាននិយាយថា ខ្លួនបានដាក់បម្រុងទាហានជាង ២៦៨.០០០ នាក់ឱ្យត្រៀមសម្រាប់ប្រតិបត្តិការស្វែងរក និងជួយសង្គ្រោះ។ប្រទេសនេះបានព្រមានពីទឹកជំនន់នៅតំបន់ទំនាប និងផលប៉ះពាល់លើវិស័យកសិកម្ម រួមទាំងនៅតំបន់ខ្ពង់រាបកណ្តាល ដែលជាតំបន់ដាំដុះដំណាំកាហ្វេសំខាន់៕